لاہور:وزارت مذہبی امور نے نجی اسکیم کے عازمین حج کی آگاہی کے لیے ہدایت نامہ جاری کردیا۔ترجمان وزارت مذہبی امور کے مطابق پرائیویٹ حج اسکیم کا کل کوٹہ 25ہزار698عازمین تک محدود ہے،پرائیویٹ حج اسکیم کیلئے کوئی اضافی کوٹہ منظور نہیں کیا جائے گا۔
اعلامیے کے مطابق ادائیگی سے قبل نجی منظم کی حیثیت اور حج کوٹے کی تازہ منظوری کی تصدیق لازمی کریں۔ترجمان کے مطابق منظور شدہ منتظمین کی فہرست اور کوائف کی تصدیق وزارت کی ویب سائٹ سے کریں، سوشل میڈیا یا دیگر ذرائع کی غیرمصدقہ معلومات یا اشتہارات پر ہرگز انحصار نہ کریں۔
وزارت مذہبی امور نے ہدایت کی ہے کہ منتظمین بھی اپنے تصدیق شدہ کوٹے سے زائد بکنگ نہ کریں، خلاف ورزی کرنے والے منتظمین کے خلاف سخت کارروائی کی جائے گی۔وزارت مذہبی امور و بین المذاہب ہم آہنگی کا کہنا ہے کہ وزارت ایک شفاف، ذمہ دار اور مربوط حج آپریشن کو یقینی بنانے کے لیے پرعزم ہے۔
اس مقصد کے حصول کے لیے عوام کا تعاون ناگزیر ہے تاکہ تمام انتظامات حج پالیسی اور سعودی عرب کے قواعد و ضوابط کے مطابق انجام پا سکیں۔
