اسلام آباد:وزارت اطلاعات و نشریات نے بھارت کا جھوٹا پراپیگنڈا بے نقاب کرنے کے لیے عالمی اور مقامی صحافیوں کو لائن آف کنٹرول کا خصوصی دورہ کروایا ہے۔ نجی ٹی وی کے مطابق وزارتِ اطلاعات و نشریات نے ہفتے اوراتوار کے روز ملکی و غیر ملکی میڈیا کو لائن آف کنٹرول کا دورہ کرانے کا اعلان کیاتھا۔
ترجمان وزارتِ اطلاعات کے مطابق صحافیوں کے اس خصوصی دورے کا مقصد بھارت کے من گھڑت اور جھوٹے پراپیگنڈے کو عالمی برادری کے سامنے بے نقاب کرنا ہے۔ترجمان کا کہنا ہے کہ بھارت ایک عرصے سے پاکستان کے خلاف خیالی اور فرضی دہشت گرد کیمپس کا واویلا کرتا رہا ہے تاہم اب ان تمام الزامات کی حقیقت کو زمینی سطح پر سامنے لایا گیا ہے۔
وزارتِ اطلاعات کے مطابق میڈیا نمائندوں کو اْن مخصوص مقامات پر لے جایا گیا جنہیں بھارت کی جانب سے دہشت گرد کیمپس قرار دیا گیا تھا۔ذرائع کا کہنا ہے کہ میڈیا کو زمینی حقائق سے آگاہ کر کے بھارتی دعوؤں کی قلعی کھول دی گئی ہے۔
ترجمان کا کہنا ہے کہ پاکستان عالمی امن کے لیے اپنی غیر متزلزل وابستگی پر قائم ہے اور کسی بھی قسم کی دہشت گردی یا دہشت گردانہ سرگرمیوں کو مکمل طور پر مسترد کرتا ہے۔وزارتِ اطلاعات کا کہنا ہے کہ پاکستانی قوم اپنی خودمختاری کے تحفظ کے لیے پرعزم ہے اوربھارت کی کسی بھی جارحیت کا فوری اور بھرپور جواب دیا جائے گا۔
