نئی دہلی:پہلگام فالس فلیگ آپریشن کی ناکامی سے بھارتی فضائیہ بھی بوکھلاہٹ کا شکار ہوگئی، بھارتی فضائیہ اپنے ہی عوام کی دشمن بن گئی اس کے لڑاکا طیارے نے اپنی ہی آبادی پر بم گرا دیا۔
ذرائع کے مطابق واقعہ بھارتی ریاست مدھیہ پردیش کے علاقے شیوپوری میں پیش آیا، بم گرنے سے آبادی اور املاک کو شدید نقصان پہنچا، بم گرنے سے متعدد مکانات تباہ ہوگئے جبکہ ہلاکتوں کی بھی اطلاعات ہیں۔
دفاعی ماہرین کے مطابق واقعہ بھارتی فضائیہ کی غیر ذمہ داری اور بوکھلاہٹ کو ظاہر کرتا ہے، اس سے قبل بھی بھارتی فضائیہ لڑاکا طیاروں کے حادثے معمول کا حصہ ہیں، اکثر حادثات میں بھارتی فضائیہ کے لڑاکا طیارے آبادی پر گرچکے ہیں۔
دفاعی ماہرین کے مطابق پے در پے جدید طیاروں، پے لوڈ اور بموں کا گرنا بھارتی فضائیہ کی دفاعی صلاحیت پر گہرا سوالیہ نشان ہے، بھارتی فضائیہ جدید ٹیکنالوجی میں ناکامی کے ساتھ ساتھ پائلٹوں کی تربیت میں بھی ناکام ہے۔
ایئر فورس نے ایک بیان میں ڈراپ ٹینک کے ”نادانستہ ” گرنے سے املاک کو ہونے والے نقصان پر افسوس کا اظہار کیا۔ فضائیہ نے وجہ معلوم کرنے کے لیے انکوائری کا حکم دیا ہے اور یقین دہانی کرائی ہے کہ املاک کو پہنچنے والے نقصان کا معاوضہ مقررہ طریقہ کار کے ذریعے فراہم کیا جائے گا۔
انڈین میڈیا کے مطابق گوالیار سے تقریباً 135 کلومیٹر دور شیو پوری میں بم گھر کی چھت پر گرا۔ عینی شاہدین نے اس سے قبل بتایا تھا کہ ایک نامعلوم بھاری چیز صبح 11 بجے کے قریب استاد منوج ساگر کے مکان کی چھت پر گری۔ حکام نے بتایا کہ گھر کے دو کمروں کو مکمل طور پر نقصان پہنچا اور ملبہ قریب کھڑی کار پر گرا۔
