اسلام آباد:پاکستان اور بنگلا دیش کے درمیان دوطرفہ تعلقات کو مزید مستحکم کرنے کے لیے اہم پیش رفت۔ دونوں ممالک کے درمیان سیاسی مشاورتی اجلاس 17اپریل کو بنگلا دیش کے دارالحکومت ڈھاکا میں منعقد ہونے کا امکان ہے۔
یہ اجلاس 13سال بعد ہو رہا ہے، آخری سیاسی مشاورتی اجلاس 2012ء میں ہوا تھا۔میڈیارپورٹ کے مطابق ذرائع کا کہنا ہے کہ اس اجلاس میں پاکستان کی جانب سے سیکرٹری خارجہ آمنہ بلوچ شرکت کریں گی، جبکہ اس موقع پر دونوں ممالک کے درمیان باہمی تعلقات کو ادارہ جاتی ٹریک پر لانے کی تجویز بھی زیر غور آئے گی۔
اس کے علاوہ اجلاس میں مشترکہ وزارتی کمیشن کی بحالی پر بھی بات چیت کی جائے گی۔سیاسی مشاورتی اجلاس کے بعد پاکستان کے نائب وزیراعظم اسحاق ڈار 22سے 24اپریل تک بنگلا دیش کا دورہ کریں گے۔ اس دورے میں دونوں ممالک کے مابین مزید اقتصادی اور سیاسی تعلقات کو فروغ دینے کے لیے بات چیت کی جائے گی۔پاکستان اور بنگلا دیش کے درمیان اس اجلاس اور دورے کی متوقع پیش رفت سے دونوں ممالک کے تعلقات میں مزید بہتری کی امید ہے۔
