کوئٹہ/کراچی:وفاقی وزیر ریلوے حنیف عباسی نے کوئٹہ میں معطل ہونے والا ٹرین آپریشن آج سے بحال کرنے کا اعلان کر دیا۔کوئٹہ میں پریس کانفرنس کرتے ہوئے وزیر ریلوے حنیف عباسی کا کہنا تھا کہ جعفر ایکسپریس آج پشاور سے کوئٹہ روانہ ہوگی اور کل کوئٹہ سے سفر شروع کرے گی۔
بولان میل ہفتے میں 7 روز چلے گی، عید اسپیشل ٹرین 29 مارچ کو کوئٹہ سے روانہ ہوگی، عید کے پہلے تین دنوں کیلئے 20 فیصد رعایت رکھی گئی ہے۔انہوں نے کہا کہ جعفر ایکسپریس پر حملہ دنیا کے بڑے واقعات میں سے ایک ہے، قیمتی جانوں کے ضیاع پر افسوس ہے، حملے میں نہتے شہریوں کو شہید کیا گیا، دہشت گردوں نے زبان قوم اور فرقوں کی بنیاد پر حملہ کیا جبکہ دنیا بھر نے اس حملے کی مذمت کی ہے۔
ان کا کہنا تھا کہ ملک بھر میں جاری دہشت گردی پاکستان کے خلاف منصوبہ سازی ہے، ہمارے لوگ دہشت گردوں کو معاونت فراہم کرتے ہیں، اس لئے وہ کامیاب ہوتے ہیں، ہم چھٹی ایٹمی طاقت ہیں، اس لئے ملک میں دہشت گردی کو پروان چڑھانے کی کوشش کی جارہی ہے۔
حنیف عباسی نے کہا کہ ملک کی بہادر سیکورٹی فورسز کو خراج تحسین پیش کرتے ہیں، ٹرین پر حملے کے بعد سیکورٹی فورسز کا ردعمل قابل اطمینان تھا، ضرار کمپنی کے کمانڈوز نے اپنی جانیں خطرے میں ڈال کر لوگوں کی جانیں بچائیں۔
وزیر ریلوے کا کہنا تھا کہ ایک انسان کا قتل پوری انسانیت کا قتل ہے، سیکورٹی اور حکومتی دونوں سطح پر فیصلہ ہو چکا ہے کہ دہشت گرد جہاں ہوں گے ان کا پیچھا کیا جائے گا، سیکورٹی فورسز کے جوانوں نے حملے میں ملوث بہت سے دہشتگردوں کو واصل جہنم کر دیا ہے۔
قبل ازیں وفاقی وزیر ریلوے حنیف عباسی نے چیئرمین مظہر علی شاہ اور سی ای او ریلوے امیر بلوچ کے ہمراہ کوئٹہ ریلوے اسٹیشن کا دورہ کیا اور حملے سے متاثرہ جعفر ایکسپریس کی بوگیوں کا معائنہ کیا۔وفاقی وزیر کا کہنا تھا کہ ہمارے سیکورٹی کے ایشوزہیں،ریلوے اسٹیشنوں میں اسکینر نہیں ہیں، دیگر مسائل ہیں، ریلوے پولیس میں 500 لوگوں کی تعیناتی کی جائیگی اور اس کے علاوہ 1000لوگ بھرتی کریں گے۔
وزیر ریلوے کا کہنا تھا کہ بلوچستان میں چلنے والی ٹرینوں کی تعداد کو 2003,2004کی پوزیشن پر لائیں گے، ان شاء اللہ ہم نے مسافروں کو فول پروف سیکورٹی فراہم کرنی ہے۔دوسری جانب عید الفطر کی آمد کے ساتھ ہی لوگوں کی بڑی تعداد کراچی سے اپنے آبائی علاقوں میں عید منانے جا رہی ہے۔
اس موقع پر پاکستان ریلویز کی جانب سے 3 عید اسپیشل ٹرینوں کا آغاز کیا گیا ہے تاکہ اضافی مسافروں کو سفر کرنے میں آسانی ہو۔یہ عید اسپیشل ٹرینز کراچی سے لاہور اور راولپنڈی تک جائیں گی۔
