کراچی:وزیر اعلیٰ سندھ مراد علی شاہ نے کراچی کے شہری مسائل کی رپورٹنگ کے لیے پورٹل بنانے کی ہدایت کردی جبکہ روڈ کٹنگ کی منظوری صرف میئر اور کمشنر کراچی دے سکیں گے،عید کے موقع پر سہولت اور سیکورٹی میں اضافے کی ہدایت بھی کردی۔
وزیر اعلیٰ ہائوس میں منعقد اجلاس میں وزیر بلدیات سعید غنی،میئر کراچی مرتضیٰ وہاب، وزیر اعلیٰ کے معاون خصوصی وقار مہدی، چیف سیکریٹری آصف حیدر شاہ، وزیراعلیٰ کے پرنسپل سیکریٹری آغا واصف، کمشنر کراچی حسن نقوی، چیئرمین پی اینڈ ڈی نجم شاہ اور سیکریٹری بلدیات خالد حیدر شاہ نے شرکت کی۔
اجلاس کے دوران نکاسی آب، غیر قانونی تجاوزات، سڑکوں کی کٹائی، صفائی، سیکورٹی اور ٹریفک مینجمنٹ جیسے اہم مسائل پر تبادلہ خیال کیا گیا۔ شہر کے بنیادی ڈھانچے اور خدمات کی بہتری کے لیے کئی اہم فیصلے کیے گئے۔
وزیر اعلیٰ سندھ سید مراد علی شاہ نے نشاندہی کی کہ شہر کے تین اضلاع میں سڑکوں کی کٹائی سے شہریوں کو مشکلات کا سامنا ہے جبکہ ان میں سے کئی سڑکیں حال ہی میں تعمیر کی گئی تھیں۔ انہیں آگاہ کیا گیا کہ مقامی ٹائونز نے اپنے علاقوں میں روڈ کٹنگ کی اجازت دی تھی جس پر وزیر اعلیٰ نے فیصلہ کیا کہ آئندہ روڈ کٹنگ کی اجازت صرف میئر اور کمشنر کراچی دیں گے۔
انہوں نے محکمہ بلدیات کو ہدایت دی کہ ایک ایگزیکٹو آرڈر جاری کیا جائے تاکہ کوئی بھی کے ایم سی یا ٹائون افسر خودمختارانہ طور پر روڈ کٹنگ کی منظوری نہ دے سکے۔وزیر اعلیٰ نے چیف سیکریٹری کو بھی ہدایت دی کہ روڈ کٹنگ کے عمل کو منظم کیا جائے تاکہ عوام کو کم سے کم مشکلات کا سامنا کرنا پڑے۔
اجلاس کے دوران وزیر اعلیٰ نے مختلف چھوٹے مسائل کی نشاندہی کی جن میں گٹروں کا بہائو، صفائی کے مسائل، مرکزی سڑکوں پر ملبہ اور دیگر عوامل شامل ہیں جو ٹریفک کی روانی میں خلل ڈالنے کے ساتھ ساتھ انتظامیہ کی ساکھ کو بھی نقصان پہنچا رہے ہیں۔
انہوں نے کمشنر کراچی کو شہری مسائل کی نگرانی مزید موثر بنانے کی ہدایت کی اور کہا کہ اسسٹنٹ کمشنرز شہر بھر میں معائنہ کریں تاکہ نکاسی آب کے مسائل، صفائی کی خرابی اور غیر قانونی پارکنگ جیسے معاملات حل کیے جا سکیں۔
وزیر اعلیٰ نے یہ بھی اعلان کیا کہ سی ایم ہائوس میں ایک خصوصی کراچی ایشوز پورٹل بنایا جائے گا جہاں اسسٹنٹ اور ڈپٹی کمشنرز کو نکاسی آب، تجاوزات اور صفائی سے متعلق رپورٹس اپ لوڈ کرنا ہوں گی۔عید کی آمد کے پیش نظر وزیر اعلیٰ مراد علی شاہ نے کہا کہ شہری خریداری کے لیے مارکیٹوں کا رخ کریں گے۔
انہوں نے چیف سیکریٹری آصف حیدر شاہ کو ہدایت دی کہ سیکورٹی کو بہتر بنانے کے لیے پولیس گشت میں اضافہ کیا جائے اور عید کی خریداری کے دوران شہریوں کی سہولت کے لیے خصوصی انتظامات کیے جائیں۔
وزیر اعلیٰ نے کے ایم سی اور ٹریفک پولیس کو بھی ہدایت دی کہ اہم تجارتی علاقوں میں اسٹریٹ لائٹنگ، ٹریفک مینجمنٹ اور سیکورٹی کے انتظامات کو مزید بہتر بنایا جائے۔وزیر اعلیٰ مراد علی شاہ نے میئر کراچی کو ہدایت دی کہ وہ سال کے اختتام تک چار بڑی مارکیٹوں اور ان کے اطراف کو خوبصورت بنانے کے اقدامات کریں اور شہر میں نشست گاہیں تعمیر کریں۔
انہوں نے کہا کہ اگلے سال ہم مزید مارکیٹوں اور عوامی مقامات کو بہتر کرکے شہریوں اور سیاحوں کیلئے زیادہ پرکشش بنا سکتے ہیں۔مزید برآں اجلاس میں لیاری میں جاری واٹر پائپ لائن کی تنصیب کا جائزہ لیا گیا جو تاحال مکمل نہیں ہو سکی۔
وزیر اعلیٰ نے وزیر بلدیات کو ہدایت دی کہ وہ اس منصوبے کی تکمیل میں تیزی لائیں اور انہیں باقاعدہ اپڈیٹ فراہم کریں۔ انہوں نے کہا کہ اگر مسائل درپیش ہوں تو انہیں پی اینڈ ڈی ڈپارٹمنٹ کے ذریعے حل کریں۔
وزیراعلیٰ سندھ نے عید کے بعد تجاوزات کے خلاف کارروائی کی واضح ہدایات دیتے ہوئے کہا کہ عوامی مقامات کو ہر ممکن حد تک قابلِ رسائی بنانے کیلئے سافٹ انکروچمنٹ کو ہٹایا جائے۔
