کراچی:امیر جماعت اسلامی حافظ نعیم الرحمان نے کہا ہے کہ جو جو پارٹیاں 26ویں ترمیم میں شامل تھیں انہوں نے قومی جرم کیا ہے۔کراچی میں پریس کانفرنس کرتے ہوئے امیر جماعت اسلامی حافظ نعیم الرحمان کا کہنا تھا کہ 26ویں ترمیم کر کے ایک مجرمانہ عمل کیا گیا ہے،عدالتیں اپنا کردار ادا نہیں کررہیں۔
کراچی میں ایک پراجیکٹ10،10 سال میں مکمل نہیں ہوتا، آدھا انکم ٹیکس کراچی اور باقی پورا ملک دیتا ہے۔انہوں نے کہا کہ15سال ہوگئے کے فور منصوبہ بناکر نہیں دیا جارہا،سرکولر ریلوے کا پراجیکٹ مکمل نہیں ہورہا،اس وقت شہر میں موٹرسائیکل سوار ڈمپروں اورٹینکروں کا نشانہ بن رہے ہیں،کل ایک وزیر ڈبل ڈیکر کا اعلان کررہے تھے ،پہلے سنگل تو چلا کردکھا دیں۔
انہوں نے کہا کہ یہ ایک دوسرے کے خلاف بیان دیتے ہیں اور نورا کشتی کرتے ہیں، یہ عوام کے ٹھکرائے ہوئے لوگ ہیں، ان کو پہلے ایم این اے شپ اور اب وزارتیں بھی دی جائیں گی،پارلیمنٹ جعلی ہے، یہ فیک ہے اس پر کوئی پیکا لگے گا؟
انہوں نے کہ ایم کیو ایم اور پیپلزپارٹی نے شہر کا بیڑا غرق کردیا ہے،حافظ نعیم الرحمان نے اعلان کیا کہ جماعت اسلامی رمضان کے بعد ملین مارچ کرے گی۔انہوں نے کہا کہ کراچی کو 17ہزار بسوں کی ضرورت ہے یہ صرف 300بسیں لائے ہیں۔
حافظ نعیم الرحمان کا کہنا تھا کہ نہ ریڈلائن بن رہی ہے اورنہ اورنج لائن، یہ کرپٹ بھی ہیں اور نااہل بھی، کرپشن اور نااہلی کے امتزاج کا نام سندھ حکومت ہے، ہزاروں بچوں کا مستقبل داؤ پر لگا ہوا ہے، یہ تعلیمی نسل کشی کررہے ہیں، بدقسمتی سے شہر کے لوگوں کی کوئی ترجمانی کرنے والا نہیں۔
کراچی شہر کے لوگوں کی ترجمانی صرف جماعت اسلامی کررہی ہے، خیبرپختونخوا اس وقت دشمنوں کی آماجگاہ بنا ہوا ہے۔امیر جماعت اسلامی نے کہا کہ نوراکشتی اپنی جگہ ایم کیو ایم ہر حکومت میں شامل ہوتی ہے، اس نئی حکومت میں بھی پاکستان اسٹیل مل نہیں چل رہی، پاکستان اسٹیل مل سے 1370ملازمین کو نکال دیا گیا ہے، پاکستان اسٹیل مل تو منافع میں چلتی تھی، کوئی پوچھے پاکستان اسٹیل نقصان میں کیسے آئی۔
