قاہرہ: وزیراعظم محمد شہباز شریف کی ہدایت پر نیشنل ڈیزاسٹر مینجمنٹ اتھارٹی ، الخدمت فائونڈیشن کے ساتھ مل کر غزہ کی پٹی کے برادر عوام کو انتہائی ضروری انسانی امداد فراہم کر رہی ہے ، پاکستان کا ایک اور خصوصی طیارہ 55 ٹن امدادی سامان لے کر مصر کے العریش بین الاقوامی ہوائی اڈے پر پہنچ گیا۔
امدادی سامان میں موسم سرما کے خیموں کے ساتھ ساتھ ترپال اور خیمے بھی شامل ہیں۔پاکستانی سفارتخانہ کی جانب سے جاری بیان کے مطابق قاہرہ میں پاکستانی سفارتخانے کے افسران نے امدادی سامان وصول کیا اور غزہ میں فلسطینی ہلال احمر سوسائٹی کو آگے بھیجنے کے لیے مصری ہلال احمر سوسائٹی کے حوالے کر دیا۔ بیان میں کہا گیا کہ پاکستان فلسطینی بھائیوں اور بہنوں کے ساتھ کھڑا رہے گا اور انتہائی ضروری انسانی امداد فراہم کرے گا۔
مصر کی اہم حمایت پر اظہار تشکر کرتے ہوئے کہا گیا کہ پاکستان کی حکومت اور عوام کی طرف سے مزید امدادی کھیپ روانہ کی جا رہی ہیں اور جلد ہی غزہ میں فلسطینیوں تک پہنچائی جائیں گی۔
