پشاور:خیبر پختونخوا حکومت نے رمضان پیکیج کے تحت مستحق گھرانوں کو 10، 10 ہزار روپے دینے کا اعلان کر دیا، یوتھ انڈومنٹ فنڈ کی بحالی کے لئے 100 ملین گرانٹ، فاٹا ٹریبونل کے چیئرمین اور ممبران کے فکسڈ پے پیکیج میں اضافے کی منظوری دے دی گئی۔
وزیر اعلیٰ خیبر پختونخوا علی امین گنڈا پور کی زیر صدرات صوبائی کابینہ کا اجلاس ہوا، اجلاس کو صوبائی حکومت کے مالی نظم ونسق اور کارکردگی کے بارے میں بریفنگ دی گئی۔اجلاس کو بریفنگ کے دوران بتایا گیا کہ گذشتہ 6 ماہ کے دوران حکومت کا سرپلس بجٹ 169ارب روپے ہے، موجودہ حکومت نے ایک سال میں اپنی آمدن میں ریکارڈ 49 فیصد اضافہ کیا،حکومت نے سابق دور حکومت کے بقایاجات میں 18.5 ارب روپے ادا کیے۔
بریفنگ کے مطابق خیبر پختونخوا میں اس وقت ہیموفیلیا کے 850 مریض رجسٹرڈ ہیں، اجلاس میں ان مریضوں کے علاج کے لئے1212.9 ملین روپے کی منظوری دی گئی۔قرض اتارنے کے لئے ڈیبٹ مینجمنٹ فنڈ قائم کیا گیا، اب تک 30 ارب روپے اس فنڈ میں جمع کئے گئے ہیں، کیڈٹ کالج ممد گٹ (مہمند) کے لیے 80 ملین روپے کی گرانٹ جاری کرنے کی منظوری دی گئی۔
فاٹا ٹریبونل کے چیئر مین اور ممبران کے فکسڈ پے پیکیج میں اضافے کی منظوری دی گئی۔اجلاس میں وزیر اعلیٰ خیبر پختونخوا علی امین خان گنڈا پورنے خطاب کرتے ہوئے کہا کہ رمضان المبارک میں اشیائے ضروریہ کی قیمتوں کو کنٹرول کرنے کے لئے منتخب عوامی نمائندے اور مقامی انتظامیہ مل کر کام کریں۔
انہوں نے کہا کہ تمام کابینہ اراکین اپنے متعلقہ ڈویژنز اور اضلاع میں انتظامیہ کے ساتھ مل کر باقاعدگی سے فیلڈ وزٹس کریں۔ صوبائی حکومت نے اس سلسلے میں تمام ڈویژنل کمشنرز اور ڈپٹی کمشنرز کو تحریری احکامات جاری کر دیے ہیں۔
علی امین خان گنڈا پور کا کہنا تھا کہ صوبائی حکومت کے رمضان پیکیج کے تحت مستحق گھرانوں کو 10، 10 ہزار روپے دیے جائیں گے۔انہوں نے کہا کہ صوبائی اسمبلی کے ہر حلقے میں 5 ہزار مستحق گھرانوں کی معاونت کی جائے گی، پیکیج کی تقسیم ایک صاف اور شفاف طریقہ کار کے تحت کی جائے گی۔
