شام کے شہر منبج میں کار بم دھماکے میں 15 افراد ہلاک اور متعدد زخمی ہوگئے ہیں ۔
شامی شہری دفاع کے مطابق منبج شہر کے اطراف مرکزی شاہراہ پر ہونے والے دھماکے میں 15 افراد (14 خواتین اور ایک مرد) ہلاک اور 15 سے زائد زخمی ہو گئے۔ ہلاک اور زخمی ہونے والے تمام افراد زراعت کے کام سے وابستہ ہیں جو دھماکے کے وقت وہاں سے گزر رہے تھے۔
زخمیوں میں بعض کی حالت تشویش ناک ہے جس کے سبب ہلاکتوں کی تعداد میں اضافہ ہو سکتا ہے۔ دھماکے کے بعد جائے حادثہ پر افراتفری اور خوف کا ماحول تھا۔ اس دوران ایمبولینس کی گاڑیاں دھماکے کے مقام کی سمت روانہ ہوگئیں۔
عرب میڈیا کے مطابق منبج میں کئی ہفتوں سے ترک نواز مسلح گروپوں اور کرد فورسز کے درمیان شدید لڑائی جاری ہے۔ یہ دھماکا “نیشنل آرمی” کے زیراثر علاقے میں ہوا ہے جو ترکیہ کے حمایت یافتہ گروپوں میں سے ہے۔
حالیہ عرصے میں ترک حمایت یافتہ مسلح گروپوں کے زیر کنٹرول علاقے میں ہونے والا یہ اپنی نوعیت کا چھٹا دھماکا ہے۔
یاد رہے کہ منبج شہر شمالی شام میں حلب کے مشرق میں واقع ہے۔
