عمران کو بنی گالہ منتقل کرنے کی پیشکش نہیں کی،وفاقی حکومت

اسلام آباد(اسلام ڈیجیٹل)وزیر اعظم کے مشیر سیاسی امور رانا ثناء اللہ نے بانی پاکستان تحریک انصاف عمران خان کو اڈیالہ جیل سے ان کی رہائشگاہ بنی گالہ منتقل کرنے کی پیشکش کی تردید کردی۔جمعرات کے روز اتحادی حکومت اور پی ٹی آئی کے درمیان مذاکرات کے بعد میڈیا سے گفتگو کرتے ہوئے رانا ثناء اللہ کا کہنا تھا کہ بڑی مثبت گفتگو ہوئی اور وزیر اعلیٰ خیبر پختونخوا علی امین گنڈاپور نے بڑی اچھی باتیں کی ہیں۔رانا ثناء اللہ نے بتایا کہ علی امین گنڈاپور نے کہا کہ معاملات بات چیت سے حل ہونے چاہئیں۔اس موقع پر صحافی کی جانب سے رانا ثناء اللہ سے سوال کیا گیا کہ کیا بانی پی ٹی آئی کو پیشکش کی گئی ہے کہ وہ بنی گالہ منتقل ہوجائیں ؟جس پر جواب دیتے ہوئے انہوں نے کہا کہ میری معلومات کے مطابق ایسی کوئی پیشکش نہیں کی گئی۔ان کا کہنا تھا کہ پی ٹی آئی وفد نے اپنے کارکنوں کی رہائی کی بات کی ہے اور رہائی عدالت کی ذمہ داری ہے ہمارے ہاتھ میں نہیں۔انہوں نے بتایا کہ عمر ایوب نے کہاکہ حکومت کارکنوں کی رہائی میں رکاوٹ نہ بنے۔صحافی نے سوال کیا کہ 9 مئی کے کچھ ملزمان کی سزا معاف کی گئی ہے کیا یہ مذاکرات کا نتیجہ ہے؟ اس پر رانا ثناء اللہ بولے فوج کا اپنا ایک پروسیجر ہے فوج اپنے نظام کے تحت سزا دیتی اور معاف کرتی ہے۔انہوں نے کہا کہ اپیلیں مزید لوگوں کی بھی زیر سماعت ہیں شاید ان کو بھی ریلیف مل جائے۔میڈیا سے گفتگو میں رانا ثناء اللہ نے واضح کیا کہ ہم پر کوئی امریکی دباؤ نہیں ہے۔انہوں نے کہا کہ پی ٹی آئی کی طرف سے تحریری مطالبات دیے جائیں گے تب تحریری جواب بھی دیں گے، پی ٹی آئی والے سوشل میڈیا ٹرول سے بچنے کیلئے سخت بیانات دیتے ہیں۔