میثاق معیشت کیسے ہوگا؟ تحریک انصاف کا وزیر اعظم کو جواب

اسلام آباد (اسلام ڈیجیٹل) وزیراعظم کی میثاق معیشت کی پیشکش پر اپوزیشن کا ردعمل سامنے آگیا۔ اس حوالے سے پاکستان تحریک انصاف نے چند شرائط رکھ دی ہیں۔ سینیٹ میں اپوزیشن لیڈر شبلی فراز کا کہنا ہے کہ میثاق معیشت اس وقت کامیابی سے ہمکنار ہوسکتا ہے جب وزیراعظم اور ان کا خاندان اپنی دولت ملک میں واپس لائے گا۔ شبلی فراز نے کہا کہ اشرافیہ کی جانب سے اپنی دولت اور کاروبار اس ملک میں واپس لانے پر ہی ایسا کوئی معاہدہ کامیاب ہوسکتا ہے۔انہوں نے کہا کہ اشرافیہ کو مراعات دینے کی بجائے اگر وہ پیسہ عام لوگوں کے معیار زندگی بہتر کرنے پر خرچ ہو تب ہی میثاق معیشت کامیاب ہوگا۔ شبلی فراز کا کہنا تھا کہ عدالت، انصاف اور قانون کی حکمرانی کے بعد ہی میثاق معیشت کامیاب ہوسکتا ہے وگرنہ تو یہ فقط عوام کو گمراہ کرنے کے لیے لگایا جانے والا ایک کھوکھلا نعرہ ہی ہے۔