فلسطین کی حمایت، دنیا کی مشہور کار ساز کمپنی کا سوشل میڈیا اکاؤنٹ ہیک کرلیا گیا

واشنگٹن (اسلام ڈیجیٹل )امریکا کی مشہور کارساز کمپنی فورڈ موٹر کمپنی نے کہا ہے کہ سماجی رابطے کی ویب سائٹ ایکس پر فلسطین کی حمایت پر ایک پوسٹ کے بعد اکاؤنٹ ہیک کرلیا گیا ۔غیرملکی خبررساں ادارے کی رپورٹ کے مطابق فورڈ موٹر کمپنی نے ایکس پر بیان میں کہا کہ ہمارا ایکس اکاؤنٹ مختصر وقت کے لیے ہیک کیا گیا۔ بیان میں کہا گیا کہ اس مختصر وقت میں3 پوسٹس کی گئیں جو فورڈ کی اجازت یا مرضی سے نہیں کی گئی تھیں اور وہ خیالات کا فورڈ موٹر کمپنی کی نمائندگی نہیں کرتے۔ کارساز کمپنی نے بتایا کہ فورڈ موٹر اور ایکس دونوں اس واقعہ کی تفتیش کر رہے ہیں۔ رپورٹ کے مطابق فورڈ کمپنی نے ایکس پر آزاد فلسطین، اسرائیل ایک دہشت گرد ریاست اور تمام نظریں غزہ پر ہیں جیسے پیغامات دیے تھے، جس میں اس وقت غزہ میں اسرائیل کی وحشیانہ کارروائیوں کی طرف توجہ دلائی گئی تھی۔اسرائیل نے گزشتہ ایک برس سے زائد عرصے کے دوران غزہ میں اپنی وحشیانہ کارروائیوں کے دوران 45 ہزار 500 سے زاید فلسطینیوں کو شہید کر دیا ہے، جن میں سے اکثریت خواتین اور بچوں کی ہے۔ ایکس سے فورڈ کمپنی کے پیغامات ڈیلیٹ کرنے سے قبل سوشل میڈیا اکاؤنٹس میں پھیل چکے تھے۔