وزارت خزانہ کی ماہانہ اقتصادی رپورٹ جاری کردی گئی جس میں رواں ماہ مہنگائی کی شرح میں کمی کا امکان ظاہر کیا گیا ہے۔
وزارت خزانہ کی رپورٹ کے مطابق پیٹرول اور ڈیزل کی قیمتوں میں کمی سے ضروری اشیا سستی ہوں گی اور ٹرانسپورٹ کرایوں میں کمی ہوگی جبکہ عالمی منڈی میں بھی اشیا کی قیمتوں میں کمی ہو رہی ہے۔
وزارت خزانہ کا کہناتھاکہ سیاسی استحکام اور ایکسچینج ریٹ مستحکم ہونے سے قیمتیں قابو میں رہیں گی، جولائی میں مہنگائی کی شرح 25 سے 27 فیصد تک رہنے کی توقع ہے۔
وزارت خزانہ نے بتایاکہ جنوری سے جون تک 3 لاکھ 93 ہزار 455 افراد کو بیرون ملک ملازمت ملی۔
رپورٹ کے مطابق 2023 ملکی معیشت کے لیے مشکل سال تھا، 2024 میں معاشی شرح نمو کا ہدف 3.5 فیصد حاصل کرنے کی کوشش کی جائے گی، آئی ایم ایف سے حالیہ معاہدے سے معاشی بحالی ممکن ہوگی اور دوست ممالک اور بین الاقوامی اداروں سے فنڈز دستیاب ہوسکیں گے۔
وزارت خزانہ کا کہنا ہے کہ 2023 میں تریسلات زر میں 13.6 فیصد کمی ہوئی، برآمدات میں 14.1 فیصد اور درآمدات میں 27.3 فیصد کمی ہوئی۔
