استحکام پاکستان پارٹی کے صدر عبدالعلیم خان کا کہنا ہے ملک میں معاشی استحکام کےلیے ”سبز انقلاب“ وقت کی اہم ترین ضرورت ہے۔
ایک بیان میں عبدالعلیم خان نے کہا کہ کاشتکاری کےلیے 44 لاکھ ایکڑ زمین کی نشاندہی خوش آئند ہے۔ زرعی شعبے میں انقلاب کیلئے آرمی چیف اور پاک فوج کا کردار لائق تحسین ہے۔
عبدالعلیم خان کا کہنا تھا کہ چھوٹے کاشتکار کو بلاواسطہ سہولت وزراعت میں جدید رجحانات کو فروغ دینا ہوگا، زراعت کو صنعت کا درجہ دینے کیلئے “ایگرواکنامیکل زون “بنانے ہونگے۔ ملکی وغیرملکی سرمایہ کاری سے بنجر زمینوں کو لیز پر دے کر آباد ہونا چاہیے۔
صدر آئی پی پی نے مزید کہا کہ فوڈ سکیورٹی اس صدی کا بڑا ایشو ہوگا،زرمبادلہ کمایا وبچایاجا سکتاہے، زراعت کے شعبے کےلئے غیر ملکی بالخصوص سعودی عرب کا تعاون لائق تحسین ہے۔ کسان کی خوشحالی وطن عزیز کے روشن اور محفوظ مستقبل کی ضامن ہو سکتی ہے۔
عبدالعلیم خان کا کہنا تھا کہ بہتر پیداواری ہدف کیلئے ڈرپ ایریگیشن اور آبپاشی کا جدید نظام لازم و ملزوم ہے، اقتدارمیں آکر استحکام پاکستان پارٹی زراعت کے شعبے کی ترقی کیلئے انقلابی اقدامات اٹھائے گی۔ انہوں نے کہا کہ استحکام پاکستان پارٹی کی حکومت ساڑھے 12 ایکڑ کے کاشتکاروں کوٹیوب ویل کیلئے مفت بجلی دے گی۔
