اورنگی ٹاؤن کے علاقے بارہ نمبر چڑھائی پر ڈاکوؤں نے مزاحمت کرنے پر ایک اور شخص کی جان لے لی۔
پولیس کے مطابق واردات کے دوران مزاحمت کرنے پر ڈاکوؤں نے 7 بچوں کے باپ کو فائرنگ کرکے ہلاک کردیا۔ مقتول 50 سالہ محمد واجد ولد محمد منشی سوزوکی ڈرائیور اور مکان نمبر 8/45 سیکٹر10/L عمران گورنمنٹ ہائی اسکول کے قریب پھول والی گلی کا رہائشی تھا۔ڈاکو دیدہ دلیری کے ساتھ قتل کے بعد لوٹ مار کرکے فرار ہوگئے۔
مقتول کے بیٹے محمد شہروز نے بتایا کہ ہم 2 بہنیں اور 5 بھائی ہیں۔ والد گزشتہ 15 برس سے سوزوکی پک اپ میں علاقے کے مچھلی فروخت کرنے والوں کو فشری لے کر جاتے تھے۔ علی الصبح تقریباً 4 بجے وہ گھر سے نکل کر مچھلی فروشوں کو لینے کے لیے 12 نمبر چڑھائی پر کھڑے تھے کہ موٹرسائیکل سوار ڈاکو آئے اور لوٹ مار کے دوران مزاحمت پر قتل کرکے فرار ہو گئے۔
تدفین سے قبل مقتول کی دونوں شادی شدہ بیٹیاں، بیٹے اور دیگر عزیز و اقارب زار و قطار روتے رہے۔پولیس کے مطابق واقعے کی تحقیقات شروع کردی گئی ہے۔
