سینئر ایڈوائزر وزیرِ اعلیٰ پنجاب سینیٹر انوشہ رحمان نے نواز شریف آئی ٹی سٹی منصوبے میں تیزی لانے کے لیے تمام رکاوٹیں فوری طور پر دور کرنے کی ہدایات جاری کر دیں۔
وزیرِ اعلیٰ آفس میں سینیٹر انوشہ رحمان کی زیرِ صدارت ایک اہم اجلاس منعقد ہوا، جس میں لاہور میں زیرِ تعمیر نواز شریف آئی ٹی سٹی منصوبے کی پیش رفت کا تفصیلی جائزہ لیا گیا۔ اجلاس میں منصوبے کو تیزی سے آگے بڑھانے کے لیے مختلف تجاویز پر غور کیا گیا جبکہ ڈیولپرز کو لائسنسز کے اجرا سے متعلق امور کا بھی جائزہ لیا گیا۔ اس موقع پر لائسنسز کے اجرا کی ماڈیلٹیز جلد حتمی شکل دینے پر زور دیا گیا۔
اجلاس سے خطاب کرتے ہوئے سینیٹر انوشہ رحمان نے کہا کہ وزیرِ اعلیٰ پنجاب مریم نواز شریف نے انفارمیشن ٹیکنالوجی کے فروغ کو اپنی اولین ترجیح قرار دیا ہے۔ پہلا نواز شریف آئی ٹی سٹی لاہور میں قائم کیا جا رہا ہے، جہاں ملکی اور غیر ملکی آئی ٹی کمپنیاں سرمایہ کاری کریں گی۔
انہوں نے کہا کہ وزیرِ اعلیٰ پنجاب اس اہم منصوبے کی بروقت تکمیل کی خواہاں ہیں، اسی لیے افسر شاہی کی تمام رکاوٹیں ختم کر کے منصوبے کو تیز رفتاری سے آگے بڑھانے کی واضح ہدایات دی گئی ہیں۔
اجلاس میں فیصلہ کیا گیا کہ آئی ٹی سٹی میں سرمایہ کاری کرنے والی کمپنیوں کو ہر ممکن سہولیات اور مراعات فراہم کی جائیں گی۔ وزیرِ اعلیٰ کی ہدایت کے مطابق ان کمپنیوں کو 10 سال تک انکم ٹیکس اور کسٹم ڈیوٹی میں چھوٹ دی جائے گی۔
سینیئر ایڈوائزر نے جنوبی، وسطی اور شمالی پنجاب کے دیگر شہروں میں بھی نواز شریف آئی ٹی سٹی کے قیام کے لیے زمین کی نشاندہی کا عمل جلد مکمل کرنے کی ہدایت کی۔ ان کا کہنا تھا کہ منصوبے کی تیز رفتار تکمیل سے آئی ٹی سیکٹر کو فروغ ملے گا اور عوام کو اس کے مثبت ثمرات براہِ راست حاصل ہوں گے۔
