خیبر پختونخوا کے ضلع شمالی وزیرستان کے علاقے بویا میں سیکورٹی فورسز کے بٹالین ہیڈکوارٹر پر پر فتنہ الخوارج کا حملہ ناکام بناتے ہوئے چار دہشت گرد جہنم واصل کردئیے گئے ۔سیکورٹی ذرائع کے مطابق جمعہ کی صبح ایک خوارجی خودکش بمبار نے بارودی مواد سے بھری گاڑی بویا قلعے کی مغربی دیوار سے ٹکرا دی اور زوردار دھماکہ ہو ا۔
دھماکے کے بعد 4 سے 5 خوارج نے قلعے میں داخل ہونے کی کوشش کی، تاہم سیکورٹی فورسز کی بروقت اور بھرپور جوابی کارروائی کے نتیجے میں4 خوارج موقع پر ہی ہلاک کردئیے گئے ۔حملہ آور صرف بیرونی دیوار کو جزوی نقصان پہنچانے میں کامیاب ہو سکے۔ مقامی ذرائع کے مطابق دھماکے کی آواز تقریبا 25 کلومیٹر دور واقع میرانشاہ شہر تک سنی گئی۔
ابتدائی طور پر پولیس نے بتایا تھا کہ فائرنگ کے تبادلے میں چار دہشت گرد ہلاک جبکہ چار سیکورٹی اہلکار زخمی ہوئے۔دھماکے کے فورا بعد سیکورٹی فورسز نے علاقے کو گھیرے میں لے کر کلیئرنس آپریشن شروع کردیا۔پولیس اور سیکورٹی اہلکاروں کی بھاری نفری جائے وقوع پر پہنچ گئی، جبکہ بم ڈسپوزل اسکواڈ کی خصوصی ٹیمیں بھی شواہد اکٹھا کرنے کے لیے روانہ کی گئیں۔
ریسیکو 1122 اور طبی ٹیمیں بھی امدادی اور ریسیکو سرگرمیوں میں مصروف رہیں۔ حکام کے مطابق جائے وقوع سے شواہد اکٹھے کیے جا رہے ہیں اور تحقیقات جاری ہیں۔واقعے کے بعد پورے ضلع میں سیکورٹی ہائی الرٹ کردی گئی جبکہ احتیاطی تدبیر کے طور پر ایک اہم شاہراہ پر ٹریفک عارضی طور پر معطل کر دی گئی۔
