ملک بھر کے علماء و مشائخ کا پاک فوج سے مکمل اظہار یکجہتی

اسلام آباد:قومی علما و مشائخ کانفرنس میں علما کرام نے پاک فوج سے اظہار یکجہتی اور عسکری قیادت کو خراج تحسین کیا ہے۔کنونشن سینٹر اسلام آباد میں قومی علما و مشائخ کانفرنس کی مزید تفصیلات سامنے آگئیں۔
کانفرنس میں مختلف مکاتبِ فکر کے علما نے اپنے خیالات کا اظہار کیا، شرکا نے ملکی صورتحال، عسکری اقدامات اور مذہبی ہم آہنگی کے حوالے سے اہم نکات پیش کیے۔ پاکستان کے روشن مستقبل کے لیے علمانے اپنے عزم کا اظہار کیا اور ملک کی سلامتی کے لیے متحد ہو کر کام کرنے کی اہمیت پر زور دیا۔
جامعة الرشید کے سربراہ مفتی عبدالرحیم نے کانفرنس سے خطاب کرتے ہوئے پاک فوج سے مکمل اظہارِ یکجہتی کیا اور عسکری قیادت کو زبردست خراجِ تحسین پیش کیا۔
انہوں نے کہا کہ ملک جن حالات سے گزر رہا ہے، اس میں سب سے بڑی ضرورت سیاسی اور عسکری قیادت کے مضبوط تعلق اور باہمی اتفاق کی ہے، قیادت کا یکجا ہونا آئین، دین اور شریعت کے مطابق ہے جس پر پوری قوم کو شکر ادا کرنا چاہیے۔
ان کا کہنا تھا کہ اللہ تعالی نے پاکستانی افواج کو محافظِ حرمین شریفین ہونے کا شرف عطا کیا ہے، ہماری فوج نہ صرف اسلامی فوج ہے بلکہ حرمین کی محافظ بھی ہے، اور یہ اعزاز اللہ تعالی کی جانب سے عطا کردہ ہے، اللہ تعالی نے ہماری فوج کو غزوہ ہند کی توفیق عطا فرمائی ہے، اس لئے پوری قوم کو فوج کا ہر صورت ساتھ دینا چاہیے۔
انہوں نے فتنہ الخوارج کے حوالے سے گفتگو کرتے ہوئے کہا کہ اس بارے میں 42 احادیث موجود ہیں اور اس فتنے کی سرکوبی کیلئے اللہ تعالی نے عسکری قیادت اور پاک فوج کو منتخب فرمایا ہے، اس وقت فتنہ الخوارج کے خاتمے کیلئے علما کی مدد انتہائی اہم ہے، خیبرپختونخوا اور بلوچستان میں خوارج مذہب کی بنیاد پر دہشت گردی کر رہے ہیں، جبکہ افغانستان میں فتن خوارج اور فتن الہند کو بھارت اور اسرائیل کی پشت پناہی حاصل ہے۔
مفتی عبدالرحیم نے علما سے اپیل کی کہ وہ افغانستان کو تنبیہ کریں کہ اسلام کے نام پر پاکستان کے معصوم شہریوں کا خون بہایا جا رہا ہے اور تمام علما کو یک زبان ہو کر پاک فوج کے ساتھ کھڑا ہونا چاہیے۔
پاکستان علما کونسل کے چیئرمین حافظ طاہر محمود اشرفی نے اپنے خطاب میں کہا کہ وطن کی سرحدوں کی حفاظت سپہ سالار کی ذمہ داری ہے جبکہ اس کے نظریے کی حفاظت علما کی، مدارس کے 30 لاکھ طالبعلم فوج اور قوم کی رہنمائی کے منتظر ہیں۔
شیعہ علما کونسل کے مرکزی جنرل سیکرٹری علامہ شبیر حسن میثمی نے کہا کہ “بنیان المرصوص” نے دنیا میں پاکستان کو عزت دی ہے، انہوں نے پاک فوج کے شہدا کی قربانیوں کو خراجِ عقیدت پیش کیا اور پاک فوج کے خلاف پروپیگنڈا کرنے والوں کی شدید مذمت کی۔
جمعیت اہلحدیث کے علامہ ضیا اللہ شاہ بخاری نے کہا کہ فیلڈ مارشل سید عاصم منیر کی قیادت میں افواج پاکستان نے معرکہ حق میں تاریخی فتح حاصل کی، انہوں نے واضح کیا کہ کسی نام نہاد سیاست دان کو پاک فوج کے سپاہیوں کے خلاف بات کرنے کی اجازت نہیں دیں گے۔
پیر حسان حسیب الرحمان نے اپنے خطاب میں یقین دلایا کہ علما اسلام اور پاکستان کی سربلندی کیلئے ہر قدم پر فوج کے ساتھ ہیں، پاکستان کے پاسپورٹ کو عالمی سطح پر عزت کی نظر سے دیکھا جا رہا ہے اور اوورسیز پاکستانی فخر کے ساتھ زندگی گزار رہے ہیں۔ان کا کہنا تھا کہ اگر “پیغامِ پاکستان” کو قانون کا حصہ بنا دیا جائے تو یہ دہشت گردی کے خاتمے میں اہم کردار ادا کر سکتا ہے۔