اسلام آباد:الیکشن کمیشن نے بیرسٹر گوہر کو چیئرمین پی ٹی آئی تسلیم کرنے سے انکار کردیا ۔آزاد سینیٹرز کی پی ٹی آئی میں شمولیت کی درخواست بھی مسترد کر تے ہوئے کہا ہے آپ کو آزاد سینیٹرز کو پارٹی میں شامل کرانے کا کوئی قانونی حق حاصل نہیں ۔
اس کے جواب میں بیرسٹر گوہر نے عدالت سے رجوع کا اعلان کردیا۔الیکشن کمیشن نے جوابی خط میں لکھا کہ بیرسٹرگوہر نے آزاد سینیٹرزکی پی ٹی آئی میں شمولیت کی درخواست تسلیم کرنے کا مطالبہ کیا،حالانکہ پی ٹی آئی انٹرا پارٹی الیکشن کیس زیر التوا ہے اورتحریک انصاف نے خود ہی لاہورہائیکورٹ سے اسٹے آرڈر لے رکھا ہے۔
بیرسٹرگوہرکو اس وقت چیئرمین پی ٹی آئی تسلیم کیا جا سکتا ہے نہ انہیں آزاد سینیٹرز کو پارٹی میں شامل کرانے کا قانونی حق حاصل ہے۔
دوسری جانب بیرسٹر گوہر نے الیکشن کمیشن کا جوابی خط موصول ہونے کی تصدیق کرتے ہوئے معاملہ عدالت لے جانے کا اعلان کردیا۔انہوں نے کہا کہ الیکشن کمیشن نے تاحال ہمارا انٹرا پارٹی الیکشن تسلیم کیا نہ ہی سرٹیفکیٹ جاری کیا۔
جب ہمارے سینیٹ کے الیکشن ہوئے تو آزاد سینیٹرز نے پی ٹی آئی کو جوائن کیا وہ خط میں نے الیکشن کمیشن کو بھیجا تھا 13 نومبر کو ان کا مجھے 26 نومبر کا جواب آج موصول ہوا جس میں انہوں نے کہا کہ ہم انہیں تسلیم نہیں کرتے یہ بہت بدقسمتی ہے، ہم یہ معاملہ عدالت میں لے جائیں گے، ویسے بھی یہ زیر التوا ہے ۔
ایک انٹرویو میں بیرسٹر گوہر نے پی ٹی آئی پر پابندی کا امکان بھی رد کر دیا اور سوال اٹھایا کہ الیکشن کمیشن کے مطابق پی ٹی آئی رجسٹرڈ جماعت ہی نہیں تو پابندی کیسے لگ سکتی ہے؟۔
