گوجرخان : سود و مبینہ بھتہ خوروں سے دلبرداشتہ خاتون کی موت، شوہر نے بھی خودکشی کرلی

راولپنڈی : سود و مبینہ بھتہ خوروں سے دل برداشتہ خاتون کی پراسرار موت کے بعد انصاف نہ ملنے پر شوہر نے بھی خودکشی کرلی، اہل خانہ نے لاش کے ساتھ ایس پی کے دفتر پر احتجاج کیا۔
نجی ٹی وی کے مطابق راولپنڈی کے تھانہ گوجرخان کے علاقے میں سود و مبینہ بھتہ خوروں سے دل برداشتہ ہوکر خاتون نے خودکشی کرلی تھی اور شوہر کے لیے ویڈیو پیغام موبائل میں ریکارڈ کردیے تھے، پولیس معاملے کی تفتیش کررہی تھی۔ آج خاتون کے شوہر شیراز آفتاب نے بھی خود کو گولی مار کر اپنی زندگی کا خاتمہ کرلیا۔
لواحقین نے لاش لے جا کر ایس پی گوجرخان کے دفتر کے باہر شدید احتجاج کیا۔ مبینہ خودکشی کرنے والے شیراز آفتاب کے والد نے پولیس پر سنگین الزامات عائد کر دیئے، شیراز کے والد نے کہا کہ میرے بیٹے کا قاتل پولیس آفیسر ہے، وہ ملزم کو کرسی پر بٹھا کر اور میرا بیٹا جو مدعی ہے ، اسے کھڑا کرکے بیان لیتے رہے۔ انہوں نے کہا کہ میرا بیٹا گھر آیا تو رو پڑا ، بددل ہوکر کہنے لگا کہ ابو مجھے پتا چل گیا ہے کہ انصاف نہیں ملے گا۔ بعدازاں ایس پی صدر انعم شیر مظاہرین سے مذاکرات کے لیے دھرنے میں پہنچے۔
دریں اثنا شیراز آفتاب کا خودکشی سے قبل ریکاڈ کیا گیا وڈیو بیان سامنے آگیا جس میں اس نے شدید کرب اور اذیت میں بیان ریکارڈ کرایا ہے۔ شیراز آفتاب نے کہا کہ آپ سب کو پتا ہے میرا نام شیراز آفتاب ہے ، میری اہلیہ کے ساتھ جو حادثہ ہوا جس نے کیا وہ بھی معلوم ہے،عدیل، موسی، جواد اور دولتالہ والی باجی، وغیرہ نازیہ اور سائرہ یوکے والی سب مل کر میری اہلیہ کے قاتل ہیں، مجھے اب یہ لگ رہا ہے کہ میری زندگی کا بھی خاتمہ قریب ہے، کیونکہ میں ان امیروں کا مقابلہ نہیں کرسکتا۔
شیراز آفتاب نے کہا کہ میرے دوست یار سب میرے ساتھ کھڑے رہے، میرے دوست بھائی سب پاکستان میں جمال اور انگلینڈ میں رہائشی شخص سے بچ کر رہیں، میرے ساتھ ظلم ہوا ہے، یہ لوگ پیسہ لگا کر میرے کیس کو تبدیل کرنے کی کوشش کریں گے، میرا دل اس وقت ٹوٹ چکا ہے ، میرے پاس الفاظ نہیں ہیں جو بیان کروں۔
ان کا کہنا تھا کہ مجھے جو اہلیہ نے کہا میں نے وہی ایف آئی آر درج کرائی، عدیل، جواد اور موسیٰ نے میری اہلیہ کے ساتھ بہت زیادتی کی ، اسے سود پر پیسے دیتے رہے اور بلیک میل کرتے رہے، اب میں بھی تنگ آکر جارہا ہوں۔