پاکستان سمیت دنیا بھر میں 7 اکتوبر کو سال کا پہلا سپر مون دکھائی دے گا تاہم رواں سال مزید دو سپر مون بھی ہوں گے۔اکتوبر کا مہینہ آسمانی نظاروںکے شوقین افراد کے لیے خاص ثابت ہوگا، کیونکہ 7 اکتوبر کو 2025 کا پہلا سپر مون آسمان پر اپنی پوری آب و تاب کے ساتھ نظر آئے گا، یہ دلکش نظارہ پاکستان سمیت دنیا کے بیشتر ممالک میں دیکھا جا سکے گا۔
ماہرین فلکیات نے بتایا کہ سپر مون اْس وقت ظاہر ہوتا ہے جب چاند زمین کے قریب ترین فاصلے پر ہوتا ہے، جس سے وہ عام ایام کے مقابلے میں زیادہ بڑا اور روشن دکھائی دیتا ہے، 7 اکتوبر کو چاند تقریباً 14 فیصد بڑا اور 30 فیصد زیادہ روشن نظر آئے گا۔فلکیاتی اعداد و شمار کے مطابق اس دوران چاند زمین سے 224,599 میل کے فاصلے پر ہوگا، یہ گزشتہ 11 ماہ بعد ہونے والا پہلا سپر مون ہوگا، اس سے قبل نومبر 2024 میں سپر مون دیکھا گیا تھا۔
ماہرین کا کہنا تھا کہ رواں سال مزید دو سپر مون بھی ہوں گے جو 5 نومبر اور 5 دسمبر کو دکھائی دیں گے، ان میں سب سے زیادہ روشن چاند نومبر میں ہوگا، جب وہ زمین سے صرف 221,817 میل کے فاصلے پر ہوگا۔دلچسپ بات یہ ہے کہ جنوری 2026 کا پہلا فل مون بھی سپر مون ہوگا، تاہم وہ 2025 کے سلسلے میں شمار نہیں کیا جائے گا، عموماً سال میں 3 سے 4 سپر مون نمودار ہوتے ہیں۔ماہرین فلکیات نے بتایا کہ سپر مون خاص طور پر اْس وقت زیادہ حسین منظر پیش کرتا ہے جب وہ افق کے قریب طلوع ہوتا ہے، کیونکہ اْس وقت وہ معمول سے کہیں زیادہ بڑا دکھائی دیتا ہے۔
