پاک فضائیہ کے سامنے ہزیمت اٹھانے والے ‘اْڑتے تابوت’ کے لقب سے بدنام بھارتی مگـ21 طیاروں کو فضائی سروس سے سبگدوش کردیا گیا۔بھارتی میڈیا کے مطابق بھارتی فضائیہ نے 63 سالہ خدمات کے بعد اپنے مگـ21 طیاروں کو خیرباد کہہ دیا۔ اس حوالے سے خصوصی تقریب چندی گڑھ ایئر بیس پر منعقد کی گئی جس کے مہمان خصوصی بھارتی وزیرِ دفاع راج ناتھ سنگھ تھے۔
اس الوداعی تقریب میں 2 مختلف مگـ21 طیاروں نے بھارتی فضائیہ کے لیے آخری پروازیں مکمل کیں، جس کے بعد ان طیاروں کو فضائی خدمات سے سبگدوش کر دیا گیا۔یہ طیارے کئی بار حادثات کا شکار ہوئے جس کی وجہ سے انہیں بھارت میں ‘اْڑتے تابوت’ کا ناپسندیدہ لقب بھی دے دیا گیا۔بھارت میں ان کی کارکردگی پر کئی سوالات اٹھتے رہے۔
بھارتی فضائیہ اور دوسرے دفاعی اداروں میں انکے پرزوں کی خریداری میں کمیشن اور کرپشن کے الزامات بھی لگائے گئے، 1971ء سے 2012ء تک 482 مگـ21 گر کر تباہ ہوئے جن میں 171 پائلٹ ہلاک ہوئے جبکہ ان حادثات میں 39 شہری بھی موت کے منہ میں چلے گئے۔بھارتی فضائیہ سے مگـ21 طیاروں کی سروس کا خاتمہ ایسے وقت میں ہوا ہے جب بھارتی فضائیہ کو رافیل جیسے جدید طیارے رکھنے کے باوجود پاکستان کے ہاتھوں میدان جنگ میں ہزیمت کا سامنا کرنا پڑا۔
فضائی حادثوں کے باوجود بھارتی میڈیا مگـ21 کی کارکردگی کو کافی بڑھا چڑھا کر پیش کرتا ہوا آ یا ہے۔پاک فضائیہ سے ان طیاروں کا پہلا سامنا 1965ء کی جنگ میں ہوا جب اسکواڈرن لیڈر سجاد حیدر کی قیادت میں پاک فضائیہ کے شاہینوں نے بھارت کے پٹھان کوٹ بیس پر حملہ کیا تھا، حملے کے دوران پاک فضائیہ نے زمین پر کھڑے بیشتر مگـ21 طیاروں کو راکھ کا ڈھیر بنادیا تھا۔
اس کامیابی کا ایک ثبوت تو یہ بھی ہے پھر یہ طیارے باقی تمام جنگ ستمبر 1965ء میں کسی محاذ پر نظر نہیں آئے۔1971ء میں بھارت کو روس سے خصوصی معاہدے کی وجہ سے بڑی تعداد میں مگـ21 اور دوسرا روسی ساختہ اسلحہ مل گیا تھا اور اس جنگ میں مغربی اور مشرقی محاذوں پر پاک فضائیہ کے مقابلے ان طیاروں کو بہتر پوزشین حاصل تھی۔تاہم اس جنگ میں بھی بھارتی فضائیہ کی جانب سے مجموعی طور پر 75 طیاروں کے نقصان کو تسلیم کیا گیا۔
جن میں 8 عدد مگـ21 طیارے بھی شامل تھے۔1999ء میں کارگل پر ہونے والی جھڑپوں میں 1 مگـ21 طیارے کو پاک آرمی نے مار گرایا تھا۔ اسی طرح فروری 2019ء میں 4 عدد میزائلوں کے ہمراہ بھارتی مگـ21 طیارہ جسے ونگ کمانڈر ابھی نندن اڑا رہا تھا، تاہم پاک فضائیہ کے شاہینوں نے نہ صرف طیارہ زمین بوس کیا بلکہ پائلٹ کو بھی گرفتار کرلیا تھا۔
