پنجاب اسمبلی نے تمام اسکولوں میں طلبہ کے موبائل فون کے استعمال پر پابندی عائد کرنے کی قرارداد منظور کر لی۔
ایوان کے اجلاس میں یہ قرارداد حکومتی رکن راحیلہ خادم حسین نے پیش کی، جس میں کہا گیا کہ بچے قوم کا مستقبل ہیں اور ان کی ذہنی و سماجی تربیت کی بنیادی ذمہ داری حکومت پر عائد ہوتی ہے۔
قرارداد کے متن کے مطابق موجودہ دور میں موبائل فون اور سوشل میڈیا بچوں کی ذہنی نشوونما اور اخلاقی اقدار پر منفی اثر ڈال رہے ہیں، اس لیے حکومت کو اس سنگین سماجی مسئلے کے حل کے لیے مؤثر لائحہ عمل مرتب کرنا چاہیے۔
مزید کہا گیا کہ ابتدائی اقدام کے طور پر تمام نجی اور سرکاری اسکولوں میں طلبہ کے موبائل فون کے استعمال پر مکمل پابندی لگائی جائے، جبکہ آئندہ مرحلے میں سوشل میڈیا اکاؤنٹس سے متعلق بھی قانون سازی کی جائے۔
