حکومت نے پیٹرول اور ڈیزل پر لیوی ٹیکس میں مزید اضافہ کر دیا ، شہری برس پڑے

اسلام آباد : وفاقی حکومت نے مہنگائی کے مارے عوام پر ایک اور بوجھ ڈالتے ہوئے پیٹرول اور ہائی اسپیڈ ڈیزل پر فی لیٹر پیٹرولیم لیوی میں 2 روپے 50 پیسے کا اضافہ کر دیا ہے۔
میڈیا رپورٹ کے مطابق سرکاری دستاویزات میں کہا گیا ہے کہ ہائی اسپیڈ ڈیزل پر لیوی کو 74 روپے 51 پیسے سے بڑھا کر 77 روپے 01 پیسہ فی لیٹر کر دیا گیا ہے جبکہ پیٹرول پر لیوی کو 75 روپے 52 پیسے سے بڑھا کر 78 روپے 02 پیسے فی لیٹر مقرر کر دیا گیا ہے۔
ذرائع کے مطابق وفاقی حکومت پیٹرول اور ہائی اسپیڈ ڈیزل پر علاحدہ سے 2 روپے 50 پیسے فی لیٹر “کلائمٹ سپورٹ لیوی” بھی وصول کر رہی ہے جو عوام کے لیے اضافی مالی دبائو کا باعث بن رہی ہے۔یاد رہے کہ پیٹرول7 روپے 54 پیسے فی لیٹر سستا کر دیا گیا اورپیٹرول کی قیمت 272 روپے 15 پیسے سے کم کرکے264 روپے 61 پیسے فی لیٹر کردی گئی ہے۔
دوسری جانب پاکستانی عوام نے پٹرول کی قیمت میں کمی کو ناکافی قرار دیتے ہوئے مطالبہ کیا کہ قیمت میں 150 روپے فی لیٹر تک کمی کی جائے۔وفاقی حکومت کی جانب سے پیٹرول کی قیمت میں کمی پر عوامی ردعمل آگیا، شہریوں نے پٹرول کی قیمت میں کمی کو ناکافی قرار دیتے ہوئے شدید ردعمل دیا ہے۔
کراچی، لاہور، پشاور اور فیصل آباد سمیت مختلف شہروں کے عوام کا کہنا ہے کہ عالمی منڈی میں تیل کی قیمتوں میں واضح کمی کے باوجود پاکستان میں ریلیف محدود اور وقتی ہوتا ہے۔کراچی کے شہریوں کا کہنا تھا، “پہلے 20 روپے بڑھا کر اب 7 روپے کم کر دیے، اس سے کیا فائدہ؟ ایک اور شہری نے شکوہ کیا کہ “قیمتیں کم کر کے چند دن بعد دوبارہ بڑھا دی جاتی ہیں۔لاہور کے شہریوں نے حکومت سے مطالبہ کیا کہ پٹرول کی قیمت میں 150 روپے فی لیٹر تک کمی کی جائے تاکہ حقیقی ریلیف مل سکے۔
پشاور کے شہریوں نے کہا، “کمی پر خوشی تو ہے لیکن 7 روپے سے ریلیف نہیں ملے گا، جبکہ بین الاقوامی منڈی میں خام تیل سستا ہو رہا ہے اور یہاں پٹرول مہنگا ہو رہا ہے۔فیصل آباد کے شہریوں نے بھی پٹرول کی قیمت کو کم از کم 150 روپے فی لیٹر کرنے کا مطالبہ کرتے ہوئے کہا کہ “یہ کوئی کمی نہیں، عوام کے لیے حقیقی ریلیف دیا جانا چاہیے۔
یاد رہے وفاقی حکومت نے پٹرول کی قیمت میں 7 روپے 54 پیسے فی لیٹر کمی کا اعلان کیا تھا جبکہ ڈیزل کی قیمت میں 1 روپیہ 48 پیسے فی لیٹر اضافہ کر دیا گیا ہے۔ وزارت خزانہ نے نئی قیمتوں کا نوٹیفکیشن جاری کر دیا ہے، جس کے مطابق نئی قیمتوں کا اطلاق فوری طور پر ہو چکا ہے۔نوٹیفکیشن کے مطابق پٹرول کی نئی قیمت 264 روپے 61 پیسے فی لیٹر مقرر کی گئی ہے، جب کہ ہائی اسپیڈ ڈیزل کی قیمت 285 روپے 83 پیسے فی لیٹر ہو گئی ہے۔