پنجاب کے میٹرک امتحانات میں مدارس کے طلبہ چھا گئے، کئی پوزیشنز حاصل کرلیں

ملتان :پنجاب بھر کے تعلیمی بورڈز کے میٹرک کے امتحانات میں مدارس کے طلبہ کی شاندار کارکردگی، عصری اداروں کے طلبا پر بازی لے گئے ،متعدد بورڈز کی پوزیشنز مدارس کے طلبہ نے حاصل کرلیں۔
وفاق المدارس العربیہ پاکستان کے صدر مفتی محمد تقی عثمانی، ناظم اعلی مولانا محمد حنیف جالندھری، نائب صدر مولانا انوار الحق اور دیگر رہنمائوں نے پنجاب بھر کے مختلف تعلیمی بورڈز کے سالانہ میٹرک امتحانات میں نمایاں پوزیشنیں حاصل کرنے والے دینی مدارس کے طلبہ،ان کے اساتذہ کرام اور متعلقہ مدارس کے منتظمین کو دلی مبارکباد پیش کی ہے اور اسے دینی مدارس کااعزاز قرار دیا ہے۔
فیصل آباد، ملتان اور بہاولپور بورڈ میں پہلی تینوں پوزیشنز مدارس کے طلبہ نے اپنے نام کر لیں، جامع العصر پیر محل ٹوبہ ٹیک سنگھ کے طلبہ حسنین ربانی اور علی احمد نے فیصل آباد بورڈ میں پہلی اور تیسری جبکہ جامعہ عبداللہ بن عباس جھنگ کے طالب علم محمد فیصل نے فیصل آباد بورڈ میں دوسری پوزیشن حاصل کی ،اسی طرح جامعہ حنفیہ بورے والا کے طلبا محمد احمد افضل اور محمد احمد خالد نے ملتان بورڈ میں پہلی اور دوسری ،جامعہ ابوہریرہ میلسی کے طالب علم سیف الرحمن نے ملتان بورڈ میں تیسری پوزیشن لے لی اور بہاولپور بورڈ میں جامع المدینہ چشتیاں بہاولنگر کے طلبا محمد عامر اور عمر قدوس نے پہلی اور دوسری جبکہ مرکز العلوم الاسلامیہ فورٹ عباس کے طالب علم اسد رضا نے تیسری پوزیشن حاصل کی،جامع الکوثر فتح جنگ کے طالب علم محمد حنان سعیدی نے راولپنڈی بورڈ میں پہلی، جامع المدینہ عثمان غنی کے طالب علم محمد احمد نے راولپنڈی بورڈ میں تیسری ،جامع المصطفی اسلامک سینٹر مریدکے کے طلبہ ابوبکر اور محمد طلحہ نے لاہور بورڈ میں پہلی اور دوسری، جامعہ مظاہر العلوم کوٹ ادو کے طالب علم محمد فہیم سجاد نے ڈیرہ غازی خان بورڈ میں پہلی،مدرسہ اشرف المدارس روھیلانوالی کے طالب علم محمد مزمل نے ڈیرہ غازی خان بورڈ میں دوسری، جامعہ فہم القرآن ظفروال کے طالبعلم فرحان خالد نیگوجرانوالہ بورڈ میں پہلی پوزیشن حاصل کی۔
مرکزی قائدین نے ان تمام نمایاں کامیابیوں کو نہ صرف انفرادی طلبا اور اداروں بلکہ پورے دینی مدارس کے نظام کی کامیابی کا مظہر قرار دیتے ہوئے کہا کہ یہ نتائج اس بات کا ثبوت ہیں کہ مدارسِ دینیہ نہ صرف دینی علوم کی حفاظت اور فروغ کے مراکز ہیں بلکہ جدید عصری تعلیم میں بھی نمایاں کردار ادا کر رہے ہیں۔انہوں نے پوزیشن ہولڈر طلبا، ان کے اساتذہ اور اداروں کو مبارکباد دیتے ہوئے کہا کہ یہ اعزاز دینی اداروں کے تعلیمی معیار اور مدارس کے روشن مستقبل کی علامت ہے۔
قائدین نے حکومت، ذرائع ابلاغ، اور تعلیمی حلقوں سے اپیل کی کہ وہ مدارس کی خدمات کا اعتراف کریں اور انہیں دیوار سے لگانے کے ہر قسم کے اقدام سے گریز کریں۔مولانا عبد القدوس محمدی کے مطابق پنجاب بورڈ سے قبل فیڈرل بورڈ میں بھی اسلام آباد کے معروف دینی مدرسہ ادارہ علوم اسلامی نے دو پوزیشنیں حاصل کی تھیں سال 2025 میں ادارہ علوم اسلامی کے جنید خان اور اعظم خان نے فیڈرل بورڈ میں بالترتیب دوسری اور تیسری پوزیشن حاصل کی اس طرح صرف ایک مدرسہ ادارہ علوم اسلامی کی گزشتہ چند برسوں کے دوران فیڈرل بورڈ میں حاصل کردہ مجموعی پوزیشنز اور میڈلز کی تعداد 53 ہو گئی ہے۔