مری/لاہور:پنجاب کابینہ میں توسیع کا فیصلہ کر لیا گیا،مری میں شریف خاندان کی اہم بیٹھک کی اندرونی کہانی سامنے آگئی، پنجاب کابینہ میں 10 وزراء اور مشیروں کے اضافے کا امکان ہے، کابینہ میں شامل ہونے والوں میں اکثریت جنوبی پنجاب سے ہوگی جبکہ پنجاب کابینہ میں توسیع آئندہ ماہ متوقع ہے۔
ذرائع نے یہ بھی بتایا کہ ن لیگ کے صدر نواز شریف نے پارٹی رہنمائوں کو نہ صرف پنجاب کابینہ کی توسیع کا گرین سگنل دیا ہے بلکہ نواز شریف اور مریم نواز اراکین سے ملاقاتوں کے نام بھی شارٹ لسٹ کر چکے ہیں۔
ادھرنجی ٹی وی کے مطابق وزیراعظم شہباز شریف نے پارٹی قائد کو صدر آصف زرداری سے ہونے والی ملاقات کی تفصیلات سے آگاہ کیا، پارلیمنٹ سے مجوزہ آئینی ترمیمی بل پر قانون سازی کے حوالے سے تبادلہ خیال کیا گیا، نئے چیئرمین الیکشن کمیشن کے نام پر بھی تبادلہ خیال ہوا۔
وزیراعظم نے نواز شریف کو مجوزہ آئینی پیکیج کی بعض شقوں پر پیپلز پارٹی کی طرف سے تحفظات سمیت وفاق اور کے پی میں مولانا فضل الرحمن کیساتھ ورکنگ ریلیشن شپ کیلئے رابطوں اور ملاقاتوں کی تفصیلات سے بھی آگاہ کیا۔
اس موقع پرنواز شریف نے وزیراعظم سے گفتگو کرتے ہوئے کہا کہ ملکی سیاسی انتظامی و آئینی معاملات میں اتحادیوں کو آن بورڈ اور ان کی آراء کو مقدم رکھا جائے، سیلاب سے متاثرہ غریب عوام کا جانی مالی نقصانات کا سروے کرا کے انہیں معقول معاوضہ دیا جائے۔
آئندہ سال قدرتی آفات سے نمٹنے کے لئے ایک جامع و ٹھوس لائحہ عمل مرتب کیا جائے۔دونوں رہنماؤں نے بلوچستان اور کے پی میں دہشت گردی کے خاتمے پر پاک افواج کو خراج تحسین پیش کیا۔
