راولپنڈی : معرکہ حق میں تاریخ ساز کامیابی پر فیلڈ مارشل جنرل سید عاصم منیر کی جانب سے صدر مملکت، وزیراعظم سمیت سیاسی وعسکری قیادت کے اعزاز میں عشائیہ دیاگیا۔ آئی ایس پی آر کے مطابق عشائیے میں چیئرمین جوائنٹ چیفس آف اسٹاف اور سروسز چیفس بھی شریک ہوئے۔ فیلڈ مارشل عاصم منیر نے بھارتی جھوٹے پروپیگنڈے کا بھرپورجواب دینے میں پاکستانی نوجوانوں اورمیڈیا کے کردارکو ”فولادی دیوار“ قراردے دیا۔ شرکاءنے مسلح افواج کی جرات و قربانیوں کوخراج تحسین پیش کیا۔
آئی ایس پی آرکے مطابق فیلڈ مارشل سید عاصم منیر، نشان امتیاز (ملٹری) نے ”معرکہ حق“ اور آپریشن ”بنیان مرصوص“ کے دوران افواج پاکستان کے عزم و حوصلے، پاکستانی عوام کی ناقابل تسخیر روح اور سیاسی قیادت کی پختہ وابستگی کو خراج تحسین پیش کرنے کے لیے عشائیہ کا اہتمام کیا۔تقریب میں صدرآصف علی زرداری، وزیراعظم شہباز شریف، نائب وزیراعظم، وزیر خارجہ اسحاق ڈار، چیئرمین سینیٹ سید یوسف رضا گیلانی، اسپیکر قومی اسمبلی ایاز صادق، وفاقی وزراء، گورنرز، وزرائے اعلیٰ، چیئرمین جوائنٹ چیفس آف اسٹاف کمیٹی، سربراہان فضائیہ و بحریہ، بڑی سیاسی جماعتوں کی سینئر قیادت، اعلیٰ سرکاری عہدیداران اور تینوں افواج کے سینئرافسران نے شرکت کی۔
آئی ایس پی آرکے مطابق شرکاءنے قومی قیادت کو معرکہ حق کے دوران دانشمندانہ قیادت پر خراج تحسین پیش کیا، افواج پاکستان کی جرات و قربانی کو سراہا، اور پاکستانی عوام کی استقامت و حب الوطنی کی تعریف کی۔ آئی ایس پی آرکے مطابق چیف آف آرمی اسٹاف نے اپنے خطاب میں معرکہ حق کے دوران قومی قیادت کی حکمت عملی پر اظہار کیا اور آپریشن ”بنیان مرصوص“ میں افواج پاکستان کے مابین شاندار ہم آہنگی کو سراہا، جس سے آپریشن کی کامیابی یقینی بنی۔ترجمان پاک فوج کے مطابق فیلڈ مارشل عاصم منیر نے بھارتی جھوٹے پراپیگنڈے کا بھرپور جواب دینے میں پاکستانی نوجوانوں اور میڈیا کے کردار کو ”فولادی دیوار“ قرار دیا اور ان کی غیر معمولی خدمات کو خراج تحسین پیش کیا۔
آئی ایس پی آر کے مطابق فیلڈ مارشل نے پاکستانی سائنسدانوں، انجینئرز، اور سفارتکاروں کے عزم اور پیشہ ورانہ مہارت کو بھی سراہا، جن کی پیشہ ورانہ مہارت اور عزم پاک بھارت تنازع کے دوران بھی تذبدب کا شکار نہیں ہوا۔ آخر میں ان کا مزید کہنا تھا کہ آج کا دن قومی یکجہتی، نئی طاقت اور ہم آہنگی کے ساتھ آگے بڑھنے کے اجتماعی عزم کو جلا بخشتا ہے۔
