سہ فریقی اجلاس، سی پیک کو افغانستان تک توسیع دینے پر اتفاق

بیجنگ : بیجنگ میں پاکستان، چین اور افغانستان کے درمیان اعلیٰ سطح کا سہہ فریقی اجلاس ہوا۔ اجلاس میں پاکستان کے نائب وزیرِاعظم و وزیرِ خارجہ اسحاق ڈار، چین کے وزیر خارجہ اور افغانستان کے وزیر خارجہ ملا امیر خان متقی نے شرکت کی۔ اجلاس میں سی پیک کو افغانستان تک توسیع دینے پر اتفاق کیا گیا۔
میڈیارپورٹ کے مطابق یہ اتفاق رائے تینوں کے درمیان چین کے دارلحکومت بیجنگ میں منعقدہ اعلی سطح کے اجلاس میں کیا گیا ۔ اجلاس میں تینوں ممالک کے وزرائے خارجہ نے اپنی اپنی ٹیموں کی قیادت کی اور خطے میں استحکام، باہمی تعاون، اقتصادی روابط، اور سیکیورٹی امور پر تفصیلی گفتگو کی گئی۔
ذرائع کے مطابق یہ اجلاس مثبت، تعمیری اور دوستانہ ماحول میں منعقد ہوا۔ترجمان دفتر خارجہ کے مطابق اس موقع پر خطے میں دہشت گردی کا مشترکہ مقابلہ کرنے پر بھی اتفاق کیا گیا۔ دفتر خارجہ کے ترجمان کا کہنا تھا کہ وزرائے خارجہ نے خطے کی سلامتی اور اقتصادی روابط کو فروغ دینے کیلئے تعاون کے عزم کا اظہار کیا اور بیلٹ اینڈ روڈ انیشیٹو پر تعاون کو گہرا کرنے پر اتفاق کیا۔
نائب وزیراعظم و وزیر خارجہ اسحاق ڈار نے چینی دارالحکومت بیجنگ میں افغان ہم منصب امیر خان متقی سے ملاقات کی۔ ملاقات میں دونوں وزرائے خارجہ نے پاکستان اور افغانستان کے درمیان دوطرفہ تعلقات کو فروغ دینے، تجارت اور ٹرانزٹ کی سہولیات میں اضافے سمیت باہمی تعاون کے مختلف شعبوں پر تبادلہ خیال کیا۔ملاقات میں اسحاق ڈار اور امیر متقی نے اس امر پر اتفاق کیا کہ دونوں ممالک خطے میں امن، ترقی اور استحکام کے لیے مل کر کام کریں گے۔
فریقین نے تجارت، ٹرانسپورٹ، سرحدی تعاون اور عوامی رابطوں کو مزید مضبوط بنانے پر بھی زور دیا۔دونوں رہنماؤں نے اس بات پر اتفاق کیا کہ پاکستان اور افغانستان کے درمیان باہمی مفادات کے تحفظ اور علاقائی چیلنجز سے نمٹنے کے لیے قریبی تعاون ناگزیر ہے۔ ملاقات ایک خوشگوار ماحول میں ہوئی اور مستقبل میں مزید رابطوں کے تسلسل پر بھی بات چیت کی گئی۔