مصر نے عالمی عدالت انصاف سے فلسطینیوں کی بے دخلی روکنے کا مطالبہ کیا ہے۔
مصر نے منگل کے روز بین الاقوامی عدالت انصاف میں ایک زبانی دلیل جمع کرائی ہے جس میں فلسطینی علاقوں میں قابض طاقت کے طور پر اسرائیل کی ذمہ داریوں کے بارے میں بات کی گئی ہے۔
اپنی استدعا کے دوران مصری وفد نے عدالت کے لیے اس بات پر زور دیا کہ وہ یہ اعلان کرے کہ فلسطینی عوام کے حق خود ارادیت میں یہ حق بھی شامل ہے کہ وہ اپنی سرزمین پر اپنی معاشی، سماجی اور ثقافتی ترقی کو آگے بڑھا سکیں۔
اسی طرح فلسطینی عوام کو جلد بحالی اور تعمیر نو کے لیے ترقیاتی امداد حاصل کرنے کا حق بھی حاصل ہے۔ اسی طرح ان کا یہ حق بھی ہے کہ انہیں بے گھر یا بے دخل نہ کیا جائے۔
مصری وفد نے کہا کہ مقبوضہ علاقوں میں اسرائیل کی جانب سے بین الاقوامی انسانی قانون اور بین الاقوامی انسانی حقوق کے قانون کی سنگین خلاف ورزیاں ایک وسیع، منظم اور جامع پالیسی کا حصہ ہیں۔
اس پالیسی کا مقصد فلسطینی سرزمین کے حقیقی الحاق کو حاصل کرنا ہے۔ اسرائیلی کنیسٹ قانون سازی کرکے فلسطینی پناہ گزینوں کے لیے اقوام متحدہ کی ریلیف اینڈ ورکس ایجنسی (UNRWA) کے کردار کو کمزور کر رہی ہے۔
مصری وفد نے مزید کہا کہ اسرائیلی خلاف ورزیوں کا مقصد فلسطینی عوام کی واپسی کے حق کو روکنا ہے۔ واپسی کا حق بین الاقوامی قانون اور اقوام متحدہ کے چارٹر کے تحت ضمانت یافتہ ان کے حق خودارادیت کا بنیادی ستون ہے۔
اسرائیل کی جانب سے جبری بے دخلی اور بار بار نقل مکانی کرائی جارہی ہے۔ فلسطینیوں کو ان علاقوں میں بھیجا جارہا ہے جہاں زندگی کی بنیادی ضروریات میسر نہیں ہیں۔
مصری وفد نے انکشاف کیا کہ اسرائیل جو کچھ کر رہا ہے وہ ایسے حالات پیدا کرنے کی ایک منظم پالیسی کا حصہ ہے جس کا مقصد غزہ کو ناقابل رہائش بنانا ہے۔
اپنی استدعا کے دوران مصری وفد نے نشاندہی کی کہ اکتوبر 2023 سے اسرائیل بھوک سے موت اور غزہ کی مکمل ناکہ بندی کو ایک ہتھیار کے طور پر استعمال کر رہا ہے۔
وہ جان بوجھ کر اور من مانے طریقے سے غزہ کے تمام راستوں کو بند کر کے غزہ کو بنیادی ضروریات سے محروم رکھ رہا ہے۔
مصری وفد نے کہا کہ سات اکتوبر 2023 ء سے اب تک غزہ کی پٹی میں 52000 فلسطینیوں کو قتل کیا جا چکا ہے۔ ان شہید ہونے والوں میں اکثریت خواتین اور بچوں کی ہے۔
مصری درخواست میں ان قانونی دلائل کا جائزہ لینے پر توجہ مرکوز کی گئی ہے جو اقوام متحدہ کے چارٹر کے تحت اقوام متحدہ کے ایک رکن ریاست کے طور پر اسرائیل پر عائد ذمہ داریوں کو پورا کرنے کویقینی بنائیں۔
