لاہور :وفاقی وزیر برائے مذہبی امور سردار یوسف نے کہا ہے کہ حج پروازیں 28اپریل سے شروع ہوں گی، 90ہزار حاجی سرکاری طور پر جائیں گے، حج سے متعلق انتظامات حتمی مراحل میں ہیں، عازمین حج کے لیے بہترین انتظامات کیے گئے ہیں۔
سعودی عرب جاکر حجاج کرام کے لیے انتظامات اور سہولیات کا جائزہ لیا ہے، عازمین حج کو ملک کے مختلف اضلاع میں تربیت دی جا رہی ہے اور حجاج کی ٹریننگ کا دوسرا مرحلہ جلد شروع ہوگا۔
حج تیاری 2025ء کے حوالے سے لاہور میں پریس کانفرنس سے خطاب کرتے ہوئے سردار یوسف نے تجویز پیش کی کہ حجاج کو ٹریننگ سے پہلے ہی ویکسین دی جائے تاکہ ان کی صحت کے حوالے سے کوئی پریشانی نہ ہو۔
انہوں نے مزید بتایا کہ حجاج کے لیے فلائٹس 28اپریل سے شروع ہوں گی اور اس سال سرکاری حج اسکیم کے تحت 90ہزار حاجی سعودی عرب روانہ ہوں گے۔ حجاج کے لیے تمام انتظامات حتمی مراحل میں ہیں۔ان کا کہنا تھا کہ لانگ ٹرم حج 10لاکھ 50ہزار تک چلا گیا ہے جبکہ شاٹ ٹرم 11لاکھ 50ہزار روپے میں ہوگا۔
جو پیسے بچ جاتے ہیں وہ حاجی کو واپس کر دیئے جاتے ہیں جو کہ حاجیوں کا حق ہے، 2مہینے باقی رہ گئے ہیں، حاجیوں کیلئے اچھے انتظامات ہوں گے، وہاں سعودی حکومت بھی بہتر سے بہتر انتظامات کرتی ہے۔
وفاقی وزیر مذہبی امور نے کہا کہ وزیر حج نے بتایا کہ حجاج کی سہولت کیلئے میڈیکل مشن، ٹرانسپورٹ سمیت دیگر انتظامات بہتر کئے ہیں، یہ انتظامات سعودی حکومت خود کرتی ہے، مجھے یہ آج تک اطلاع نہیں ہے کہ کسی حاجی نے بھیک مانگی ہو، بھکاریوں کو لے جانے والی کمپنی کو بلیک لسٹ کر دیا جائے گا۔
انہوں نے کہا کہ حج اور عمرے کا تعلق عقیدے کے ساتھ ہے، جو بھی اس حوالے سے کام کیا جاتا ہے وہ عقیدہ ہے، اس حوالے سے وزیراعظم شہباز شریف سے ملاقات ہوئی، ان کی ہدایت پر عمل کر رہے ہیں، حجاج کو ویکسینیشن سمیت دیگر اقدامات کئے جارہے ہیں۔ان کا کہنا تھا کہ بزرگ حضرات کے حوالے سے خاص خیال رکھا جائے۔
پنجاب یونیورسٹی کے آڈیٹوریم میں تربیت دی جائے گی، ملک بھر میں جب پروازیں شروع ہوں گی، افسروں کی ڈیوٹیاں لگائی جائیں گی۔ وفاقی وزیر نے حکومت کی پالیسی پر بات کرتے ہوئے کہا کہ حکومت میں سب سے زیادہ توجہ مہنگائی پر دی گئی ہے اور مہنگائی ایک سال کے اندر سنگل ڈیجٹ تک آگئی ہے۔
جس سے عام آدمی کو فائدہ پہنچا ہے۔ انہوں نے کہا کہ وزیراعظم نے دو روز قبل عوام کو خوشخبری سنائی ہے اور امید ہے کہ جلد عام آدمی کو مزید فائدہ پہنچایا جائے گا۔
