کراچی:سینئرصوبائی وزیرشرجیل انعام میمن نے کہا ہے کہ پیپلز پارٹی نے واضح الفاظ میں کہا کہ عوام کے ساتھ کھڑی ہے نہ کہ شہباز شریف کے ساتھ، مسلم لیگ (ن) میں کچھ نا سمجھ لوگ ہیں جو آئین پڑھتے نہیں اور بیان دے دیتے ہیں۔
کراچی میں پریس کانفرنس کرتے ہوئے انہوں نے کہا کہ ذوالفقار علی بھٹو کی برسی گڑھی خدا بخش میں منائی گئی، اس برسی میں پی پی کے لیڈر بلاول بھٹو زرداری نے تاریخی خطاب کیا، خطاب میں ملک کے موجودہ مسائل پر روشنی ڈالی، سندھ کے سب سے بڑے مسئلے کینالز پر واضح پالیسی بیان دیا۔
انہوں نے کہا کہ بلاول بھٹو نے واضح الفاظ میں کہا کینالز نا منظور ہیں، بلاول بھٹو نے کہا ہم شہباز کے ساتھ نہیں عوام کے ساتھ کھڑے ہیں، کسی بھی صورت میں کینالز کو بننے نہیں دیا جائیگا، پانی کے بارے میں ابھی تک پنجاب حکومت واضح نہیں کر سکی کہ پانی کہاں سے آئیگا۔
ان کا کہنا تھا کہ پیپلز پارٹی کسی صورت کینالز نہیں بننے دے گے، بیرونی ہاتھ پاکستان کو نقصان پہنچانے کی کوشش کر رہے ہیں، ہم کسی صورت ملک کو نقصان پہنچنے نہیں دیں گے، چیئرمین بلاول بھٹو نے کہا ہے جو لوگ افراتفری چاہتے ہیں انہیں کسی صورت قبول نہیں کیا جائیگا،بینظیر بھٹونے کالا باغ ڈیم والے مسئلے پر دھرنا دیا تھا۔
شرجیل انعام میمن نے کہا کہ این ایف سی ایوارڈ آصف علی زرداری نے دیا، آصف علی زرداری نے ملک کے ہر کونے کی آواز کو سنا تھا اور کالا باغ ڈیم کے مسئلے پر فیصلہ دیا تھا، این ایف سی ایوارڈ کے بعد صوبائی خود مختاری پر بھی آصف علی زرداری کے دور میں کام ہوا تھا۔
خیبر پختونخوا کا نام بھی آصف علی زرداری نے ہی رکھا تھا۔سینئر صوبائی وزیر نے کہا کہ بلوچستان کے لیے پیکیج کا اعلان بھی آصف علی زرداری نے کیا تھا، مشکل حالات میں پاکستان کھپے کا نعرہ بھی آصف علی زرداری نے لگایا تھا۔
بلاول بھٹو نے جلسے میں کہا کہ ہم تمام صوبوں کو ایک ہونا چاہیے، کینالز کا مسئلہ سب سے پہلے پیپلز پارٹی نے اٹھایا ہے۔انہوں نے کہا کہ چیئرمین نے یہ اعلان کیا ہے اٹھارہ اپریل کو کینالز اور دہشتگردی کے مسئلے پر حیدرآباد میں جلسہ کرنے جا رہے ہیں، یہ جلسہ ایک تاریخی جلسہ ہوگا۔
مخالفین جو چاہتے ہیں ملک میں استحکام نہ ہو ان کے کہنے پر فیصلے نہیں ہوتے فیصلہ ہماری لیڈر شپ کرتی ہے، لیڈر شپ ہمیشہ صحیح وقت پر صحیح فیصلے کرتی ہے۔ان کا کہنا تھا کہ کینالز پر باقی پارٹیاں جو تقریریں کر رہی ہیں وہ کینالز پر کم پیپلز پارٹی کے خلاف زیادہ کر رہی ہیں، عظمیٰ بخاری کو آئین پڑھنا آتا ہے، پنجاب کی وزیر اطلاعات جیسا شخص اطلاعات کے منصب پر بیٹھ کر غلط بیان دے رہا ہے۔
عظمیٰ بخاری کی خواہش ہے کہ پیپلز پارٹی اور پنجاب حکومت آمنے سامنے آئے،پیپلز پارٹی کینالز پر سیاست نہیں کر رہی،پیپلز پارٹی ایک سلجھی ہوئی سیاست کر رہی ہے، پیپلزپارٹی اپنے لوگوں کے حقوق کی حفاظت کر رہی ہے۔
شرجیل میمن نے کہا کہ سندھ میں سات کروڑ لوگ بستے ہیں، سندھ کے لوگوں کو پتہ ہے پیپلز پارٹی والے مر جائیں گے لیکن سندھ کے مفاد میں کوئی سودا نہیں کریں گے، آصف علی زرداری اس ملک کے سب سے قابل سیاستدان ہیں، کوئی عقلمند انسان عظمیٰ بخاری جیسا بیان نہیں دے سکتا، اگر عظمیٰ بخاری کو پیپلز پارٹی کے ساتھ کوئی مسئلہ ہے تو بیٹھ کر حل کریں نہ کہ غلط بیانات دیں۔
صوبائی وزیر نے کہا کہ پی ٹی آئی نے ان مدرسوں کو فنڈنگ کی جن کے ذریعے دہشت گردی کو پھیلایا گیا، پی ٹی آئی نے کہا طالبان کے دفاتر یہاں کھولے جائیں، پی ٹی آئی کے لیے دعا ہے کہ اللہ انہیں بچا کر رکھے، ہمارے قائدین اور ورکرز کو ہمیشہ نشانہ بنایا گیا۔
ان کا کہنا تھا کہ پیپلز پارٹی نے کہا تھا پی ٹی آئی سے بات کرنے کو تیار ہیں پی ٹی آئی نے منع کر دیا، پیپلز پارٹی چاہتی ہے صوبے چلیں کام ہو۔شرجیل انعام میمن کا کہنا تھا کہ مشکل حالات میں بھی پیپلز پاٹی نے پاکستان مضبوط کرنے کی کوشش کی،پیپلز پارٹی کا وفد وزیر اعظم سے مل چکا ہے، پیپلز پارٹی واضح پیغام دے چکی ہے کہ کینالز پر کوئی سمجھوتہ نہیں ہوگا۔
