روس نے پاکستانیوں کے لیے 30 ٹن خوراک کا تحفہ بھیج دیا

اسلام آباد: روس نے پاکستانیوں کے لیے 30 ٹن خوراک، دوائیں، کپڑے و دیگر ضروری اشیا کا تحفہ بھیجا ہے۔
روسی سفارت خانے کے ترجمان نے کہا ہے کہ عید الفطر کے موقع پر روس کی طرف سے پاکستان میں ضرورت مندوں کے لیے خصوصی امداد کا تحفہ بھیجا گیا ہے۔ روس کی جانب سے آنے والی امداد تیس ٹن کی خوراک، ادویات، کپڑوں، اور دیگر بنیادی ضروریات کی اشیا پر مبنی ہے، روسی وزارت برائے ہنگامی حالات کی خصوصی فلائٹ کے ذریعے امدادی سامان پاکستان پہنچایا گیا۔
پاکستان میں متعین روسی سفیر البرٹ خوریف نے امدادی سامان ہلال احمر پاکستان کے حوالے کیا، سامان کی حوالگی کی تقریب میں روسی سفیر البرٹ خوریف اور ترجمان دفتر خارجہ شفقت علی خان شریک ہوئے، روسی سفیر نے پاک روس تعلقات میں انسانی ہمدردی کی بنیاد پر تعاون کو اجاگر کیا، اور کہا روس پاکستان کے عوام کی مدد کے لہے ہمیشہ تیار ہے۔