مکہ مکرمہ :مسجد الحرام میں ماہ رمضان کے پہلے 10 دنوں میں ڈھائی کروڑنمازیوں اور زائرین کی آمد ہوئی۔ میڈیارپورٹس کے مطابق ماہ رمضان کے پہلے 10دنوں میں 55 لاکھ سے زائد مسلمانوں نے عمرہ ادا کیا۔
اس حوالے سے سیکورٹی، اسکاٹس رضاکاروں اور خواتین کارکنوں کی تعداد میں اضافہ کیا گیا ہے۔ مکہ مکرمہ کے کمانڈ اینڈ کنٹرول سینٹر میں 200سے زائد اسکرینز نصب کیے گئے ۔ادارہ امور الحرمین کی جانب سے رمضان کے دوران میں یومیہ بنیادوں پر مسجد الحرام میں اعلی معیار کے عود کی دھونی سے معطر کیا جاتا ہے۔
میڈیارپورٹس کے مطابق ادارہ الحرمین کی انتظامیہ کی جانب سے جاری بیان میں کہا گیا ہے کہ مسجد الحرام میں ماحول کو معطر رکھنے کے لیے روزانہ 20 مرتبہ عود کی دھونی دی جاتی ہے۔حجر اسود، ملتزم اور رکن یمانی کو یومیہ بنیاد پر ہر نماز سے قبل عود اور عنبر سے معطر کیا جاتا ہے جس کے لیے روازنہ 2 کلو گرام عود استعمال کیا جاتا ہے۔
مسجد الحرام کے زائرین ہمیشہ معطر ماحول میں طواف، نماز، تلاوت اور عبادت کرتے ہیں۔مسجد الحرام اور خانہ کعبہ کو معطر کرنا اور رکھنا انتظامیہ کے بنیادی فرائض میں شامل ہے۔ سعودی حکومت اس پر خطیر رقم خرچ کرتی ہے۔واضح رہے الحرمین انتظامیہ کی جانب سے مسجد الحرام کی مستقل بنیادوں پر صفائی کے لیے ماہ رمضان میں اضافی عملے کو بھی تعینات کیا جاتا ہے۔
