اسلام آباد:ماہ مبارک میں سستی اشیا کی عوام تک فراہمی کے سلسلے میں وزیر اعظم شہباز کی جانب سے علیحدہ سکیم کے تحت یوٹیلیٹی سٹورز پر رمضان ریلیف پیکیج کا آغاز کر دیاگیا۔
800 سے زائد برانڈڈ اشیا پر 15 فیصد تک رعایت دی جائے گی۔ وفاقی وزیر صنعت و پیداوار رانا تنویر نے اسلام آباد کے سیکٹر جی نائن مرکز میں یوٹیلیٹی سٹور پر رمضان پیکیج کا آغاز کیا ۔
وزیر اعظم شہباز شریف کی ہدایت کے مطابق یوٹیلیٹی سٹورز پر رمضان ریلیف پیکیج عوام کو سہولت فراہم کرنے کے لیے علیحدہ سکیم ہے جس کے تحت گلگت بلتستان اور آزاد کشمیر سمیت ملک بھر کے لیے 20 ارب روپے کے ریلیف کا اعلان کیا گیا تھا۔
رمضان پیکیج کے آغاز پر وفاقی وزیر صنعت و پیداوار رانا تنویر حسین نے حکام کو سٹورز پر اشیاء کی مقدار اور معیار یقینی بنانے کی ہدایت بھی کی ہے۔رمضان ریلیف پیکیج کے تحت سستی اشیا کی فراہمی کیلئے ملک بھر میں قائم یوٹیلٹی سٹورز کے کھلے رہنے کے اوقات بھی بڑھا کر صبح نو بجے سے رات دس بجے تک کردیے گئے۔
