فلسطینی مزاحمتی تنظیم حماس نے جمیعت علمائے اسلام کے سربراہ مولانا فضل الرحمن کو خراج تحسین پیش کرتے ہوئے کہا ہے کہ آپ نے فلسطین کاز پر اپنا حق ادا کردیا ہے۔
ذرائع ابلاغ کے مطابق جے یو آئی سربراہ مولانا فضل الرحمان وفد کے ہمراہ قطر پہنچے جہاں اُن کی حماس رہنماؤں اور مجلس شوریٰ کے سربراہ سے ملاقات ہوئی۔
ترجمان جے یو آئی کے مطابق مولانا فضل الرحمن اور حماس کی مجلس شوری کے سربراہ ابوعمر دونوں نے وفود کی قیادت کی۔ ملاقات میں غزہ و فلسطین کی تازہ صورتحال پر تبادلہ خیال کیا گیا۔
ملاقات میں فضل الرحمان نے حماس رہنماؤں کو ہر قسم کے تعاون کی یقین دہانی کراتے ہوئے کہا کہ فلسطین آزاد ریاست ہے ، اسرائیلی قبضے کی حمایت نہیں کی جاسکتی، مسجد اقصٰی اور فلسطین کی آزادی کے لئے فلسطینی عوام کی جدوجہد کی حمایت کرتے ہیں۔
حماس کی مجلس شوریٰ کے سربراہ نے تعاون پر مولانا فضل الرحمان کا شکریہ ادا کرتے ہوئے کہا کہ مولانا فضل الرحمان اور جے یو آئی امت مسلمہ کی طرف سے فرض کفایہ ادا کررہے ہیں۔
انہوں نے کہا کہ غزہ میں گھروں کی تعمیر ، خیموں ،ادویات اور رمضان میں سحر وافطار کے لئے پاکستانی عوام اور امت مسلمہ تعاون کی اپیل کرتے ہیں۔
مولانا فضل الرحمان نے بھی پاکستانی عوام سے اپیل کی کہ وہ اپنے فلسطینی بھائیوں کے ساتھ بھرپور تعاون کریں۔
واضح رہے کہ جے یو آئی وفد میں مولانا راشد محمود سومرو اور مفتی ابرار احمد خان شامل تھے۔
