پارلیمنٹ میں وزیر قانون سب سے متحرک، احد چیمہ خاموش ترین وزیر

اسلام آباد: پِلڈاٹ نے پہلے سال میں وفاقی وزراء کی کارکردگی پر مبنی جائزہ رپورٹ جاری کردی۔
پِلڈاٹ کے تجزیے کے مطابق سینیٹر اعظم نذیر تارڑ 2024ـ2025ء سیشن کے دوران پارلیمنٹ میں اپنی کارکردگی کے لحاظ سے وفاقی کابینہ کے سب سے زیادہ بااثر اور موثر ممبر کے طور پر سامنے آئے، ان کے پاس تین اہم محکموں کا قلمدان ہے جن میں قانون اور انصاف، انسانی حقوق اور پارلیمانی امور کے محکمے شامل ہیں۔ پہلے پارلیمانی سال کے دوران پارلیمنٹ کے دونوں ایوانوں کے مشترکہ طور پر کل 157 نشستوں میں سے 89 (57 فیصد) میں انہوں نے شرکت کی اور 17 گھنٹے سے زائد انہوں نے ایوان میں بات کی۔
خواجہ محمد آصف جن کے پاس دفاع ، دفاعی پیداوار اور ہوا بازی کے محکموں کے اہم قلمدان ہیں انہوں نے پارلیمنٹ کے 69 سیشنز (44 فیصد) میں شرکت کی اور ساڑھے پانچ گھنٹے سے زیادہ کے لیے بات کی اور پارلیمنٹ میں حاضری اور بولنے کے حوالے سے دونوں میں دوسری پوزیشن حاصل کی۔
وفاقی وزیر اطلاعات و نشریات عطاء اللہ تارڑ تیسرے نمبر پر رہے۔ انہوں نے تقریبا ساڑھے چار گھنٹوں تک بات کی لیکن 63 (40 ) نشستوں میں شرکت کی۔
وقت کی درجہ بندی میں ان کی پیروی کرتے ہوئے وزیر خزانہ سینیٹر محمد اورنگزیب ہیں جنہوں نے تقریبا 4 گھنٹے بات کی لیکن صرف 35 (22 ) نشستوں میں شرکت کی۔
بولنے کے حوالے سے پانچویں نمبر پر ، ڈپٹی وزیر اعظم اور وزیر برائے امور خارجہ سینیٹر محمد اسحاق ڈار رہے جنہوں نے صرف 32 (20 ) نشستوں میں شرکت کے باوجود 2 گھنٹے اور 45 منٹ تک بات کی۔
وزیر داخلہ سینیٹر محسن نقوی دونوں درجہ بندیوں کے حوالے سے دوسرے نمبر پر آئے۔ پورے سال کے دوران صرف 10 (6 ) نشستوں میں شرکت اور صرف 12 منٹ تک تقریر کی۔
معاشی امور اور اسٹیبلشمنٹ کے وفاقی وزیر سینیٹر احد چیمہ دونوں درجہ بندیوں کے نچلے حصے میں آئے ہیں ، انہوں نے صرف 9 نشستوں میں شرکت کی ہے اور پارلیمنٹ میں صرف 1 منٹ تک تقریر کی ہے۔ یہ تجزیہ قومی اسمبلی اجلاس کے اعداد و شمار پر مبنی ہے جو 18 فروری ، 2025 کو ختم ہوا تھا اور سینیٹ کا اجلاس 21 فروری 2025 کو اختتام پذیر ہوا۔