کراچی: شہر قائد میں ٹرالر اور ڈمپر کی ٹکر سے مزید 2 افراد زندگی کی بازی ہار گئے۔ پولیس اور قانون نافذ کرنے والے اداروں سے بے خوف ٹرک، ٹرالر اور ڈمپرز ڈرائیورز شہر کی سڑکوں پر بے قابو پھرنے لگے، جس کے نتیجے میں ٹرالر اور ڈمپر کی ٹکر سے مزید 2 افراد اپنی جان سے ہاتھ دھو بیٹھے۔
شاہراہ فیصل پر کارساز کے قریب ایک حادثے میں زخمی ہونے والا نوجوان دورانِ علاج زخموں کی تاب نہ لاتے ہوئے چل بسا، جس کی شناخت 19 سالہ شاکر علی کے نام سے ہوئی۔پولیس کے مطابق نوجوان کی موٹر سائیکل کو حادثہ ڈمپر کے ٹکرانے کی وجہ سے پیش آیا۔ ابتدائی کارروائی کے بعد پولیس نے لاش ورثا کے حوالے کرکے واقعے کی تفتیش شروع کردی ہے۔دوسری جانب شاہ لطیف کے علاقے ملیر میں تیز رفتار ٹرالر کی ٹکر سے موٹر سائیکل پر سوار ایک شخص جاں بحق اور دوسرا زخمی ہوگیا۔ حادثے کے بعد ٹرالر کا ڈرائیور گاڑی چھوڑ کر فرار ہوگیا جس کے بعد پولیس نے ٹرالر کو تحویل میں لے کر تھانے منتقل کر دیا ہے۔
ایس ایچ او شاہ لطیف، راجا عباس نے میڈیا کو بتایا کہ واقعہ شاہ لطیف ملیر انور بلوچ ہوٹل کے قریب پیش آیا جہاں تیز رفتار ٹرالر نے موٹر سائیکل سوار 2 افراد کو ٹکر مار دی، جس میں جاں بحق شخص کی شناخت 45 سالہ عامر ولد غلام مصطفی کے طور پر ہوئی جب کہ زخمی کی شناخت 35 سالہ ساجد ولد محمد ہاشم کے طور پر کی گئی ہے۔ریسکیو ذرائع نے بتایا کہ جاں بحق اور زخمی دونوں آپس میں رشتے دار ہیں، جنہیں حادثے کے بعد فورا جناح اسپتال منتقل کیا گیا۔
متوفی عامر کے کزن عبدالرحمن نے جناح اسپتال میں میڈیا کو بتایا کہ زخمی ساجد مرنے والے عامر کا ماموں ہے۔ وہ دونوں موٹر سائیکلوں پر اپنے کزن کو کینٹ اسٹیشن چھوڑ کر واپس قائد آباد آ رہے تھے کہ ملیر انور بلوچ ہوٹل کے قریب تیز رفتار ٹرالر نے ان کی موٹر سائیکل کو ٹکر مار دی، جس کے نتیجے میں عامر جاں بحق اور ساجد زخمی ہوگیا۔متوفی عامر پیدائشی گونگا اور بہرا تھا اور چند ماہ قبل اس نے پسند کی شادی کی تھی۔ وہ اسپیشل ایجوکیشن اسکول میں ملازم تھا۔ اسی طرح زخمی ساجد شادی شدہ اور ایک بچے کا باپ ہے اور نجی ٹیکسٹائل مل میں کام کرتا ہے۔ دونوں افراد مدینہ کالونی قائد آباد کے رہائشی ہیں اور ان کا آبائی تعلق خیرپور میرس سے ہے۔متوفی عامر کی تدفین خیرپور میرس میں کی جائے گی۔عبدالرحمن نے ٹرالر کے ڈرائیور کے خلاف سخت کارروائی کا مطالبہ کیا ہے جبکہ پولیس حکام نے اس معاملے کی تفتیش شروع کردی ہے۔
دوسری جانب حب ریور روڈ پر مسافر بس اورڈمپرکے تصادم کے نتیجے میں خواتین اور ڈمپر ڈرائیور سمیت 10سے زاید افراد زخمی ہو گئے۔جمعرات کی صبح سعید آباد تھانے کے علاقے میں پولیس ٹریننگ سینٹرکے سامنے حب ریورروڈ پرمسافرمزدا اورڈمپرکے تصادم کے بعد ڈمپر دیوارمیں جا گھسا جب کہ مسافر مزدا سڑک پر الٹ گئی، جس کے نتیجے میں مسافرمزدا میں سوارخواتین سمیت10 زائد افراد زخمی ہوگئے۔ حادثے میں ڈمپر ڈرائیور بھی شدید زخمی ہوگیا، جو اسٹیئرنگ میں پھنس گیا تھا۔ حادثے کے بعد زخمی ہونے والوں کو فوری طور پر سول اسپتال منتقل کیا گیا۔
کراچی میں ٹرالر اور ڈمپر بے قابو،مزید 2 افراد کچل ڈالے
