کیلیفورنیا: (ویب ڈیسک) میٹا نے ایک اہم اپڈیٹ کا اعلان کیا ہے، اب سے تمام فیس بک لائیو ویڈیوز صرف 30 دنوں کیلئے دستیاب ہوں گی۔
رپورٹ کے مطابق اب لائیو ویڈیوز کو سوشل میڈیا نیٹ ورک پر صرف 30 دن تک کیلئے سٹور کیا جائے گا اور اس کے بعد ڈیلیٹ کر دیا جائے گا، مذکورہ ویڈیوز اس سے قبل لامحدود عرصے تک محفوظ رہتی تھیں۔
میٹا نے اس اپ ڈیٹ کی وضاحت کرتے ہوئے کہا کہ زیادہ تر لوگ فیس بک لائیو ویڈیوز پہلے چند ہفتوں میں دیکھتے ہیں اس لئے ہم ان ویڈیوز کے سٹوریج کے دورانیے کو اپ ڈیٹ کر رہے ہیں، پہلے فیس بک لائیو ویڈیوز غیر معینہ مدت تک محفوظ رہتی تھیں، لیکن میٹا نے مشاہدہ کیا کہ بہت کم صارفین پرانی لائیو سٹریمز دیکھتے ہیں۔
اس تبدیلی کے نتیجے میں میٹا آئندہ چند مہینوں میں 30 دن سے زیادہ پرانی تمام فیس بک لائیو ویڈیوز کو مرحلہ وار ہٹا دے گا۔
ویڈیوز ڈیلیٹ ہونے سے قبل صارفین کو نوٹیفکیشن بھیجا جائے گا اور انہیں 90 دن کی مہلت دی جائے گی تاکہ وہ پرانی لائیو ویڈیوز کو کہیں اور محفوظ کر سکیں۔
صارفین ان ویڈیوز کو اپنی ڈیوائسز میں ڈاؤن لوڈ کر سکیں گے، کلاؤڈ سٹوریج میں ٹرانسفر کرسکیں گے یا کسی ریل کی شکل میں تبدیل کرسکیں گے۔
فیس بک پر صارفین کی جانب سے کچھ ایسی پوسٹ شیئر کر دی جاتی ہیں جو پیج بند ہونے یا محدود ہونے کا سبب بن سکتی ہیں صارفین چند ہدایات پر عمل کر کے اپنا پیج محفوظ رکھ سکتے ہیں۔
مارک زکر برگ کی جانب سے شیئر ہونے والی تحریر میں بتایا گیا تھا کہ اگر کسی بھی صارف نے کسی دوسرے شخص کو نقصان پہنچانے والا دھمکی آمیز مواد شیئر کیا تو اس کی اطلاع اور صارف کی مکمل معلومات قانون نافذ کرنے والے اداروں کو بھی دی جاسکتی ہے۔
