غزہ پر قبضے کے حوالے سے ٹرمپ کے بیان پر حماس نے ردعمل دیتے ہوئے کہا ہے کہ غزہ کوئی جائیداد نہیں جسے فروخت کردیا جائے۔
عرب میڈیا کے مطابق حماس کے سیاسی دفتر کے رکن عزت الرشق نے کہا کہ “غزہ کوئی جائیداد نہیں جس کی خرید و فروخت کی جائے، بلکہ یہ مقبوضہ فلسطینی اراضی کا اٹوٹ انگ اور ناقابل تقسیم حصہ ہے۔
یاد رہے کہ امریکی صدر ڈونلڈ ٹرمپ نے ایک بار پھر باور کرایا ہے کہ وہ غزہ کی پٹی خرید کر اپنی ملکیت میں لینے پر قائم ہیں۔ تاہم انھوں نے ساتھ یہ بھی واضح کیا ہے کہ وہ تعمیر نو میں شریک مشرق وسطیٰ کے دیگر ممالک کو غزہ کی پٹی کے بعض حصے دے سکتے ہیں۔
ٹرمپ کے اس بیان نے حماس کو پھر سے جواب دینے پر مائل کر دیا۔ تنظیم نے امریکی صدر کے بیان کی سخت مذمت کی ہے۔
ٹرمپ احمق ،دنیامدارس کے خاتمے کی سازش کررہی ہے،مولانا فضل الرحمن
حماس کے سیاسی دفتر کے رکن عزت الرشق نے باور کرایا ہے کہ “فلسطینی عوام اپنی جبری ہجرت کے حوالے سے تمام منصوبوں کو ناکام بنا دیں گے”۔ العزت نے غزہ کی خرید و فروخت کے حوالے سے ٹرمپ کے بیان کو فضول قرار دیتے ہوئے کہا کہ یہ “فلسطین اور خطے کے حوالے سے گہری جہالت” کا عکاس ہے۔
یاد رہے کہ گذشتہ روز امریکی صدر نے ایک بار پھر غزہ پر قبضے کی بات کا اعادہ کیا تھا۔
ٹرمپ کے منصوبے کو کئی عرب اور مغربی ممالک کے علاوہ اقوام متحدہ کی جانب سے فوری تنقید کا سامنا کرنا پڑا ، بالخصوص اس لیے کہ فلسطینیوں کی جبری ہجرت بین الاقوامی قوانین کی مخالفت ہے۔
