قیدیوں کا تبادلہ،پاکستان اور ملائشیا میں معاہدہ حتمی مراحل میں داخل

اسلام آباد:پاکستان اور ملائیشیا کے درمیان قیدیوں کے تبادلے کامعاہدہ حتمی مراحل میں داخل ہوگیا۔سفارتی ذرائع کے مطابق ملائیشیا کی جانب سے قیدیوں کے تبادلے کے معاہدے کا مجوزہ ڈرافٹ پاکستان کے حوالے کردیا گیا ۔
ڈرافٹ میں پاکستانی مجوزہ ترامیم کو حتمی شکل دی جا رہی ہے اور آئندہ چند ہفتوں میں معاہدے پر دونوں جانب سے دستخط کردیے جائیں گے۔سفارتی ذرائع کے مطابق معاہدے پر دستخط نائب وزیرِ اعظم اسحاق ڈار کے دورہ ملائیشیا کے دوران متوقع ہیں، ملائیشیا میں اس وقت 384 پاکستانی قیدی مختلف جرائم میں جیلوں میں ہیں۔ قیدیوں کے تبادلے کا معاہدہ ہونے کے بعد پاکستانی قیدیوں کی بقیہ سزائیں پاکستان میں بھگتنے کی راہ ہموار ہوگی۔
ذرائع کا کہنا ہے کہ ملائیشیا میں پاکستانی قیدیوں کو جیل میں شناختی کارڈ اور پاسپورٹ کی تجدید کی سہولیات حاصل نہیں ہیں، دستاویزات نہ ہونے کے باعث اکثر پاکستانی قیدی اپنی سزاؤں کیخلاف اپیل کرنے کا حق استعمال نہیں کر پاتے۔