عالمی سطح پر پاکستان پولٹری چکن پیدا کرنے والا آٹھواں بڑا ملک بن گیا

لاہور(اسلام ڈیجیٹل)عالمی سطح پر پاکستان پولٹری چکن پیدا کرنے والا آٹھواں بڑا ملک بن گیا ، جبکہ پولٹری کی صنعت نے گزشتہ ایک دہائی کے دوران 1056ارب روپے سے زائد کی سرمایہ کاری کے ساتھ 7.3فیصد کی اوسط سالانہ شرح نمو حاصل کی ۔ ایک رپورٹ کے مطابق 2023ء میں پولٹری کی برآمدات 2.24ملین ڈالر تک پہنچیں جبکہ پاکستان نے پیداواری ضروریات کو پورا کرنے کے لیے 1.5ملین ٹن فیڈ اسٹف، خاص طور پر سویابین درآمد کیا۔ پاکستان کی پولٹری انڈسٹری جنوبی ایشیا میں بھارت اور بنگلا دیش کے بعد تیسرے نمبر پر ہے جبکہ پیداواری تکنیک میں بہتری آئی ہے اور برآمدی منڈیوں میں توسیع ہوئی ہے۔ رپورٹ کے مطابق اس شعبے میں ڈومیسٹک پولٹری، بطخیں اور ان کے چوزے بھی شامل ہیں۔ پولٹری کی کل گوشت کی پیداوار (مقامی )کا حصہ تقریباً 40.7فیصد ہے۔ پاکستان میں زیادہ تر کمرشل پولٹریز برائلر ہیں جن کی پیداوار تقریباً 98فیصد تجارتی طور پر ہوتی ہے۔