اسلام آباد(اسلام ڈیجیٹل)پاکستان تحریک انصاف الیکشن کمیشن کے نئے چیف، ممبر سندھ اور ممبر بلوچستان کی تقرری کے معاملے پر سرگرم ہوگئی۔
رپورٹ کے مطابق نئے چیف الیکشن کمشنر، ممبر سندھ اور بلوچستان کی تقرری کے معاملے پر پاکستان تحریک انصاف سے تعلق رکھنے والے اور سینیٹ میں قائد حزب اختلاف سینیٹر شبلی فراز نے چیئرمین سینیٹ یوسف رضا گیلانی اور قومی اسمبلی میں اپوزیشن لیڈر عمر ایوب نے اسپیکر قومی اسمبلی سردار ایاز صادق کو الک الگ خطوط لکھ دیے۔اپنے خط میں شبلی فراز نے چیف الیکشن کمشنر کی تقرری کیلئے پارلیمانی کمیٹی تشکیل دینے کا مطالبہ کردیا۔خط کے متن کے مطابق آرٹیکل215کے تحت چیف الیکشن کمشنر سکندر سلطان کی مدت ختم ہورہی ہے، سکندر سلطان راجہ کی مدت 26 جنوری کو ختم ہوگی۔
شبلی فراز نے کہا کہ آرٹیکل213کے تحت آئینی تقاضا پورا کرنے کیلئے پارلیمانی کمیٹی تشکیل دی جائے۔اس کے بعد قومی اسمبلی میں اپوزیشن لیڈر عمر ایوب نے بھی چیف الیکشن کمشنرکی تقرری کے لیے اسپیکر قومی اسمبلی کو خط لکھ دیا۔عمر ایوب نے اسپیکر قومی اسمبلی کو چیف الیکشن کمشنرکی تقرری کے لیے پارلیمانی کمیٹی تشکیل دینے کی درخواست کی ہے۔خط میں کہا گیا کہ چیف الیکشن کمشنر سکند سلطان راجہ 26جنوری کو سبکدوش ہورہے ہیں، نئے چیف الیکشن کمشنر کی تعیناتی کیلئے پارلیمانی کمیٹی تشکیل دی جائے۔
مشیر وزیراعظم رانا ثناء اللہ نے نجی ٹی وی سے گفتگو کرتے ہوئے نئے چیف الیکشن کمشنر کی تقرری کے حوالے سے کہاکہ چیف جسٹس (ر) قاضی فائزعیسیٰ کا نام چیف الیکشن کمشنر کیلئے زیر غور نہیں۔مشیر وزیراعظم کا کہنا تھا کہ جسٹس (ر) قاضی فائز عیسیٰ چیف الیکشن کمشنر کا عہدہ قبول بھی نہیں کریں گے،چیف الیکشن کمشنر کے لیے ابھی بات چیت بھی شروع نہیں ہوئی۔
