اسلام آباد(اسلام ڈیجیٹل)وفاقی حکومت نے بجلی نرخوں میں کمی کے لیے انڈیپنڈنٹ پاور پروڈیوسرز (آئی پی پیز)کے ٹیرف میں تبدیلی اور ٹیکسوں میں کمی سمیت مختلف آپشنز پر غور تیز کردیا ہے۔
ذرائع کے مطابق وفاقی حکومت 10روپے فی یونٹ تک بجلی سستی کرنے کی کوشش کررہی ہے، بگاس کے 8 پاورپلانٹس کا ٹیرف تبدیل ہونے سے حکومت کو 238ارب روپے کی بچت متوقع ہے،یہ بچت سالانہ 8ارب روپے سے زائد بنتی ہے۔
ذرائع کے مطابق مزید16آئی پی پیز سے معاہدوں کے نتیجے میں 481ارب روپے فائدہ ہوگا، آئی پی پیز معاہدوں کے خاتمے یا ان میں تبدیلی کا فائدہ صارفین کو دیا جائے گا۔
ذرائع کے مطابق وفاقی حکومت سستی بجلی کے لیے ونٹر پیکیج میں توسیع کا جائزہ بھی لے رہی ہے جبکہ بجلی بلوں پر ٹیکسز کا بوجھ کم کرنے کی بھی تجویز زیر غور ہے۔ وفاقی حکومت سالانہ800ارب روپے سے زائد بجلی بلوں پر ٹیکسوں سے حاصل کرتی ہے۔
