اسلام آباد ، موٹروے پر جعلی ادویہ سے بھری گاڑی تحویل میں لے لی گئی

اسلام آباد (اسلام ڈیجیٹل) ملک کے مختلف شہروں میں سپلائی کے لیے لائی گئی جعلی ادویہ سے بھری گاڑی پکڑی گئی۔ ترجمان ایف آئی اے کے مطابق اینٹی کرپشن سرکل اسلام آباد نے موٹروے ٹول پلازہ کے قریب بڑی کارروائی کرتے ہوئے جعلی اور غیر معیاری ادویہ سے بھری گاڑی پکڑ کر ملزم کو گرفتار کرلیا ۔ وفاقی وزیر داخلہ محسن رضا نقوی کی ہدایات پر جعلی اور ممنوع ادویہ کی تیاری و خریدو فروخت میں ملوث عناصر کے خلاف کریک ڈاﺅن جاری ہے۔ اسلام آباد موٹر وے ٹول پلازہ کے قریب خفیہ اطلاع پر کی گئی کارروائی میں گرفتار ملزم کی شناخت محمد زمان کے نام سے ہوئی۔ ڈرگ انسپکٹر کی موجودگی میں مارے گئے چھاپے میں ملزم کی گاڑی سے 50ہزار سے زاید جعلی، غیر رجسٹرڈ اور ممنوعہ گولیاں برآمد کی گئیں۔ ملزم نے برآمد شدہ ادویہ ڈی آئی خان سے لاہور اور دیگر شہروں میں سپلائی کرنا تھی۔ ملزم سے تفتیش شروع کردی گئی ہے اور مزید قانونی کارروائی عمل میں لائی جا رہی ہے۔