اوور سیز انویسٹر چیمبر آف کامرس اینڈ انڈسٹری نے حکومت کو وفاقی بجٹ 2024-25 کے حوالے سے تجاویز دے دیں۔
اوور سیز انویسٹر چیمبر کا کہنا ہے کہ کیش لین دین کی حوصلہ شکنی کیلئے 5 ہزار کا نوٹ منسوخ کیا جائے، بینک اکاؤنٹ کے لیے این ٹی این نمبر لازمی قرار دیا جائے۔
اوور سیز انویسٹرز چیمبر کی جانب سے کہا گیا ہے کہ گاڑیوں کی خرید و فروخت اور بیش قیمت املاک کی فروخت کے لیے این ٹی این لازمی کیا جائے۔
تجویز دی گئی ہے کہ غیرملکی سفر اور کلبوں کی رکنیت کے لیے بھی این ٹی این لازمی قرار دیا جائے، نان فائلرز کی آمدن سے مطابقت نہ رکھنے والے اثاثوں اور آمدن کا پتہ چلانے کے لیے الگ سے ایف بی آر ونگ بنایا جائے۔
او آئی سی سی آئی نے ہوٹلنگ اور سفری اخراجات پر بھی وِد ہولڈنگ ٹیکس لگانے کی تجویز دی ہے۔
واضح رہے کہ او آئی سی سی آئی 200 ملٹی نیشنل کمپنیوں پر مشتمل غیرملکی سرمایہ کاروں کی نمائندہ باڈی ہے۔
