کراچی: سابق وزیر اعظم شاہد خاقان عباسی نے کہا ہے کہ جو زیادہ کمپرومائز کرے گا وہ اقتدار میں آئے گا۔
احتساب عدالت کے باہر میڈیا سے گفتگو میں شاہد خاقان عباسی کا کہنا تھا کہ یہ ایک ناکام الیکشن ہے۔ ہر آدمی اقتدار کی بات کررہا ہے کہ مجھے مل جائے۔ جو زیادہ کمپرومائز کرے گا وہ اقتدار میں آئے گا۔
شاہد خاقان کا مزید کہنا تھا کہ الیکشن کمیشن کا کمال ہے کہ فارم 47 پہلے بن گیا تھا۔ میں سمجھتا ہوں کہ فارم 47 فارم 45 سے جیت گیا۔ یہ انوکھا الیکشن تھا۔ گوگل بی پریشان ہے کہ نتائج کیا ہیں۔ چوتھی حکومت بھی آرہی ہے۔ امید ہے حکومت جلد بن جائے گی۔ وعدہ کیا گیا ہے کہ نیب کے ادارے کو ختم کیا جائے گا۔ یہ پتہ کیا جانا چاہیئے ووٹ کس کو ملا ہے۔ میں نے الیکشن نہ کرانے کا کبھی نہیں کہا میں یہ کہتا تھا آگے کا راستہ بنائے بغیر الیکشن کروائے تو وہ انتشار دیں گے۔ ملک کے مسائل کا حل نکالا جانا چاہیئے انتشار کی سیاست ختم ہونی چاہیئے۔
اس سے قبل احتساب عدالت کے روبرو پی ایس او میں غیر قانونی بھرتیوں سے متعلق کیس کی سماعت ہوئی۔ سابق وزیر اعظم شاہد خاقان عباسی سمیت دیگر ملزمان عدالت میں پیش ہوئے۔ عدالت نے ریفرنس کی سماعت بغیر کسی کارروائی 20 اپریل تک ملتوی کردی۔
