نیشنل الیکٹرک پاور ریگولیٹری اتھارٹی نے اپنی سالانہ رپورٹ میں بجلی کی تقسیم کار کمپنیوں کی ناقص کارکردگی کا پول کھول دیا۔
نیپرا نے مالی سال 22-2021 میں بجلی کی تقسیم کار کمپنیوں کی سالانہ کارکردگی رپورٹ جاری کردی ہے۔ جس میں ڈسکوز کی ناقص کارکردگی کے حوالے سے کئی انکشافات کئے گئے ہیں۔
رپورٹ میں بتایا گیا ہے کہ بجلی کی تقسیم کار کمپنیوں نے ایک سال میں قومی خزانےکو تقریبا 292 ارب روپے کا نقصان پہنچایا، ملک کا 170 ارب روپے کا نقصان صرف کم وصولیوں کی مد میں کیا جب کہ لائن لاسز سے 122 ارب روپے کا ٹیکہ لگایا گیا۔
قومی خزانے کو سب سے زیادہ 63 ارب روپے کا نقصان پشاور الیکٹرک سپلائی کمپنی (پیسکو) نے پہنچایا، لوڈشیڈنگ میں بھی یہی کمپنی سرفہرست رہی ہے۔
رپورٹ میں مزید بتایا گیا کہ گزشتہ مالی سال کے دوران کرنٹ لگنے سے 196 قیمتی انسانی جانیں ضائع ہوئیں، جو کہ اس سے پچھلے سال کے مقابلے میں 11 فیصد زیادہ ہے۔
نیپرا نے بجلی کمپنیوں کی مایوس کُن کارکردگی کا تفصیلی احوال بتانے کے بعد تجویز دی ہے کہ ان کو صوبوں کے حوالے کر دیا جائے۔
