عراق میں سابق نائب وزیر کے گھر پر چھاپے کے دوران 2 کروڑ سے زائد ڈالر ، 20 کروڑ عراقی دینار اور 60 کلو سونا برآمد کر لیا گیا۔
عراق کی سپریم جوڈیشل کونسل نے کہا ہے کہ کرپشن کے بڑے مقدمے میں 2 کروڑ 34 لاکھ ڈالر ، 20 کروڑ عراقی دینار اور 60 کلو گرام سونا ضبط کر لیا گیا ہے۔
یہ کارروائی سابق نائب وزیرِ تیل برائے ریفائننگ امور عدنان الجمیلی اور دیگر ملوث افراد کے خلاف جاری تحقیقات کے دوران کی گئی۔ عدنان الجمیلی کو چند ہفتے قبل کرپشن کے الزام میں گرفتار کیا گیا تھا۔
عراقی خبر رساں ادارے وان کے مطابق مرکزی انسدادِ بدعنوانی فوجداری عدالت کے ایک جج نے کونسل کی جانب سے جاری بیان میں بتایا کہ یہ کارروائیاں عراق کے کردستان ریجن کے تعاون سے کی گئیں۔ کارروائی کے دوران 7 گاڑیاں بھی ضبط کی گئی ہیں۔
جج کے مطابق یہ اقدامات مشتبہ شخص اور اس کے ساتھیوں کی جانب سے مکمل کیے گئے منصوبوں میں مبینہ بدانتظامی سے حاصل ہونے والی مالی رقوم اور اثاثوں کا سراغ لگانے کی کوششوں کا حصہ ہیں۔
انہوں نے کہا کہ تحقیقات اور مزید کارروائیاں جاری ہیں تاکہ زیرِ تفتیش خلاف ورزیوں سے حاصل ہونے والی رقم اور اثاثوں کی نشاندہی کرکے انہیں ضبط کیا جا سکے۔ حکام دیگر ملوث افراد کی تلاش بھی جاری رکھے ہوئے ہیں۔
عدنان الجمیلی کا کیس ایسے وقت میں سامنے آیا ہے جب عراقی حکام مالی بدعنوانی کے مقدمات کی تحقیقات اور سرکاری منصوبوں میں بدعنوانی یا بدعنوان طرزِ عمل کے ذریعے حاصل کیے گئے فنڈز اور اثاثوں کی واپسی کے لیے کوششیں تیز کر رہے ہیں۔
