کراچی:وفاقی وزیر برائے بحری امور جنید انوار نے خلیجی ممالک جانے والی تاخیری شپمنٹس پر برآمد کنندگان کو خصوصی رعایت دینے کا اعلان کیا ہے۔
وفاقی وزیر بحری امور جنید انوارکے مطابق کے پی ٹی ٹرمینلز پر اسٹوریج چارجز میں25سے50فیصد تک کمی کا اعلان کیا گیاہے جس کے تحت خلیجی ممالک جانے والی تاخیری شپمنٹس پر برآمد کنندگان کوخصوصی رعایت ملے گی۔
جنید انوار نے بتایا کہ بندرگاہوں پر پھنسے کنٹینرز کارگو پر بھی ریلیف کا اطلاق ہوگا، مالی دبائو کم کرکے برآمدات کو سہارا دیا جا رہا ہے جبکہ لاجسٹک مسائل کے خاتمے اور کارگو کلیئرنس بہتر بنانے کیلئے اقدامات جاری ہیں۔
انہوں نے یہ بھی کہا کہ کے جی ٹی ایل پر یکم سے20مارچ تک 50 فیصد اسٹوریج چارجز معاف ہوں گے، کے آئی سی ٹی پر یکم سے10مارچ تک50فیصد رعایت دی جائے گی جبکہ ایس اے پی ٹی پر11سے31مارچ تک25فیصد کمی کا اطلاق ہوگا۔
وفاقی وزیر بحری امور نے چیئرمین کے پی ٹی ریئر ایڈمرل شاہد احمد کی کاوشوں کی تعریف کی اور کہا کہ بندرگاہی نظام کو تجارتی تقاضوں سے ہم آہنگ بنانے کی ضرورت ہے۔
